Más de lo mismo

Efetivamente, Danielín. ¡Ye to mentira fiu! Ye un paripé pa la galería. Feliz Navidá y prósperu añu nuevu te diz tu Dios, pero dientro ná tan faltándote al respetu ya no solo en les redes eses, en toos los llaos. Nun va a cambiar na pa meyor. Tien muncha razón la Mafalda y tamién la tien el to primu Chusángel desde Carabanzo en la poesía qu'escribe: «Vivir del llau fuera, asomau dende'l propiu cuerpu; más pendiente d'otros que d'un mesmu», eso, viviendo pa la galería, asín tamos toos.

Nun ves esa representante de los comerciantes de Xixón que sal prohibiendu que vaiga un autobús a Parque Principau, ¿eso ye llibertá? ¡Que dexen a la xente dir onde'ios de la gana a distrayese! Tenemos que dir a comprar onde nos apetezca y yo como nun tengo coche veníame muy bien esi autobús, nun solo estes fiestes, to'l añu.

Hablen de la eco manzana de La Calzada y son incapaces a que Ensidesa… «Arcelor abuela»… Eso tamién, nun sea capaz de contaminar menos, y toa la mierda pa'l barriu. Un barriu del que talaron los árboles de la mita de les cais, arrancaron tamién toes les palmeres del muru frente al Marítimu y paez'ios bien.

«Dicen que estaban podridas, abuela».

¿Podríes? Pueo dicite yo lo que tá podrío. Ya derrumbaron del too el Parque'l Piles y a ver que van facer ahí. Probe Emilio, Garcíablanco, menos mal que nun sal ná, si ve el solar de lo que fue su casa, dai un pasmu.

Tan muy preocupaos co'l Soporting y agora quieren dai millones hasta la oposición que sigue co'la cantinela del mundial y nun jueguen ni al guá.

Van a seguir, un añu más, falando de la ampliación del Hospital de Cagüeñes pa que entre más xente en'a sala espera de urxencies; de Xixón al Norte ca día más al Sur; de Tabacalera y los grandes artistas; de los enormes conciertos internacionales con la Tyler y los Pistoles Sexuales esos que son casi de la mi quinta y nun aporten na. Que faigan una encuesta con los gustos musicales de los xixoneses y después traes, de lo que quieren, lo que puéas; tamién van falar del Xixón azul, que anantes taría gris pero dio trabayu a media ciudá. Trabayu ye lo que fai falta, y no como el que faen onde la Ma L'emigrante que lleven 2 meses pa facer una rampa, y sin trabayu más okupas y más problemas. ¡Anda que como okupen un pisu del Cerilleru, de unos que conozco, manden el Falcon! Pero lo dicho Danielín, más de lo mesmo, y si no al tiempu.