«Dalgo ta empezando a movese na cultura asturiana»

L'escritor y músicu Xaime Martínez (Uviéu, 1993) ta contentu. Malpenes una selmana después d'entamar la campaña de micromecenalgu pa financiar los dos primeros títulos de la editorial Cierva y Culiebra, el proyectu ya tien algamao más d'un ochenta por cientu del oxetivu básicu cifráu en 3.750 euros. Un sofitu que da cuenta del interés que despierta la puesta a andar d'esti nuevu sellu editorial empobináu pol autor de 'La fuercia o les cuatro epifaníes de Martín Feito' y del que nos fala, inda col optimismu en cuerpu de la recién inauguración de La Benéfica en L'Infiestu, una iniciativa puxada pol artista Rodrigo Cuevas y otros vecinos piloñetos, na que Martínez ve una seña de que «dalgo ta escomenzando a movese na cultura asturiana». L'axitador folklóricu de Vegarrionda va ser l'autor d'un de los llibros previstos pola nueva editora: 'La Xorda. Nuevos cantares de chigres', una revisión psicalíptica del repertoriu folixeru asturianu na qu'ufierta una estimulante propuesta de cantarinos nuevos y vieyos. L'otru volume col que se va estrenar Cierva y Culiebra ye 'Nun vaya ser el demoniu. El diablu n'Asturies', una esbilla de testos de tola tradición del país que tienen a Satán de protagonista dende la edá media al tiempu presente.

Mientres pasea pel centru d'Uviéu, Martínez espón: «Siempre me tiró muncho el mundu de la edición y parecíame que n'Asturies había un espaciu pa crear un proyectín nuevu col que trabayar n'espacios que'l sistema actual dexa llibres y que pueden ser interesantes. La idea ye trescender el modelu del editor individualista pa funcionar nun sentíu bidireccional ente l'equipu editorial y un grupu de xente que seríen los soscriptores». Crear una comunidá de llectores ye arriendes ún de los oxetivos del proyectu. Destamiente buscaríase enanchar la base y l'espaciu del públicu n'asturianu y pa la propia editorial valdría-y pa tener información del númberu real de llectores y poder axustar les tiraes.

Polo que toca al oxetivu netamente cultural del proyectu, nun ye menos ambiciosu: crear llibros que collaboren a repensar el mundu asturianu y n'asturianu. Los títulos escoyíos p'abrir el so catálogu, en palabres del so responsable: «Representen bien l'espíritu de la editorial y dexen ver la manera de trabayar que nos plantegamos, que nun ye la d'esperar a que nos lleguen manuscritos -qué bienafayaos serán tamién-, sinón salir a buscar esos testos. Rodrigo Cuevas tien un oyíu espectacular pa lo que ye la tradición y la vida popular, asina apareció esti proyectu de renovar los cancioneros de chigres. L'otru llibru, 'Nun vaya ser el demoniu', quier enseñar esa cara bé de la identidá asturiana a lo llargo d'estos sieglos d'historia al través de testos mui diversos cola característica principal de que traten del diablu, el gran oponente y acusador de la Humanidá, qu'eso ye lo que significa Satán n'hebréu». Nesi sentíu, apunta qu'una de les señes d'identidá del sellu ye apostar por «un llabor editorial nel que se conciban los llibros como parte d'una serie con un significáu global, facer una collección que nun seyan namás títulos interesantes, sinón que tengan esi sentíu conxuntu».

Xunta Martínez, María García Díaz, Natalia González, David Guardado y Fernando Lavandera formen el conseyu editorial d'un equipu que tien como diseñadora gráfica a Lucía Aranaz y a Diego Álvarez nel diseñu web. L'enfotu de fondu del proyectu ye encamentase al simbolismu del esconxuru de la cervatina bendita y la culiebra maldita que-y da nome, un combate de dinamismu xenerador que recueyen tradiciones como la clásica o la oriental y que representa bien «el procesu dialécticu de renovación y diálogu» d'esta iniciativa na que «queremos ser la culiebra, la cierva y el velenu», afirma l'escritor uvieín.

Temas

• Alitar Asturies