Pancho Villa (y 3)

A primeros de marzu de 1916 tolos periódicos del mundu truxeron la noticia de que los Estaos Xuníos fueran invadíos por una tropa de 589 soldaos al frente de la que diba Pancho Villa. Unos díes después entraben en México diez mil soldaos americanos col únicu aquel de garrar prisioneru a Pancho Villa y a cuantos lu acompañaran naquella fazaña.

La cosa poníase fea. D'Alfredo Álvarez Arias, hermanu de les dos güeles míes, siguía ensin sabese nada. En Cuba, el so hermanu Narciso cayó na cuenta de lo grave de la situación y volvió por él a Chihuahua. Les paredes taben enllenes de cartelos de Wanted, 5.000 dólares pola cabeza de Pancho Villa y 1.000 por cada ún de la tropa. Pancho Villa cayera feríu y taba bien escondíu nes montañes del interior. Poco depués supieron qu'Alfredo vivía guardáu con una viuda española d'un terrateniente. Fuera como fuera, d'ellí consiguió sacalu atravesando l'estáu de Durango con un Dodge Touring Car prestáu pola viuda cola encomienda de que lu entregaran a un familiar en San Miguel de Allende. El viaxe de mil kilómetros ente'l Valle de Zaragoza y San Miguel tuvo de ser toa una hestoria. Pero, yá taba a salvu.

Lo siguiente que se sabe d'Alfredo ye que tá nes Filipines, onde trabaya xunto a Narciso y otru hermanu más, Segundo, casáu ellí. La empresa yera Arego Hermanos y Cía., en Mauban, Tayabas, dedicada a la industria textil con fibra de abacá, tamién llamada cáñamu de Manila. A los pocos años, por temes de negocios, Alfredo volvió p'Asturies. De lo que se retrasó na so vuelta da cuenta una carta del 27 d'ochobre de 1921 que-y dirixe Narciso apurándolu: «Mi querido hermano: Solo he recibido una carta tuya desde que llegaste a esa, se conoce que estás divertido...». Nesta carta destaca'l párrafo «se conoce que estás divertido», que da cuenta de les azaríes nes que siguía metíu. Volver volvió a Filipines, anque nun se supo gran cosa d'él hasta febreru de 1945 cuando llega la noticia de que morriera na batalla de Manila, de la que les tropes xaponeses en retirada cometieron la matanza de civiles que se conoz como la 'masacre de Manila'. Cuando la noticia de la so muerte llegó a Morea d'Ayer, mio güela Estrella encargó una misa pol alma del so hermanu. Contóme esta hestoria Obdulio Fernández, delegáu del Gobiernu socialista de los años 80 y 90, y vecín de mio padre y mio güela en Campera, Morea d'Ayer. Los falanxistes ayeranos tovía entendíen que los malos yeren los americanos y los bonos los xaponeses y punxeron problemes. Pero con güela Estrella nun se podía: el cura dixo que sí y yá nun hubo más que dicir. A la misa asistiera l'actor José Suárez, qu'acababa de rodar 'Altar Mayor', miembru destacáu de la Falanxe ayerana. La so presencia fue suficiente, al parecer, pa que naide más dixera nada.

Temas

• Alitar Asturies