«Intento abrir nuevos campos con una lliteratura qu'algame a más xente»

Cuando la so nave somórguiase nuna superficie llíquido d'un planeta estrañu, el capitán Selgas acaba por alcontrase solu y empantanáu nuna sablera. La so misión: reaxuntar a la so tripulación, que tará albentestate, esnortiada ensin elli. Y recuperar los componentes necesarios pa reparar la nave y tornar al espaciu». Asina se presenta '¡Espetaos! Una invasión escentellada', la nueva novela de la narradora y poeta Susana Sela (Uviéu, 1968). Publicada na plataforma Amazon, ufiértase n'edición billingüe asturianu-castellanu y tamién n'inglés, un procedimientu que ya l'autora siguiera na so anterior obra '¡Bum! Les aventures de Maximín' (2021) y col qu'allampia algamar a un públicu llector lo más ampliu posible.

La escritora desplica les razones que la empobinaron a escoyer esta forma d'autoedición envede les víes avezaes de les editoriales convencionales: «Entamé probando cola espublización de poemarios y parecióme mui cenciello porque podía asina facelos billingües. Después escribí un llibru pa la reciella cola mesma fórmula y agora asoleyo esta novela que ta pensada pa tolos públicos, pero que pueden lleer perfeutamente los llectores infantiles o xuveniles», afirma. Sicasí nun escuende una de les estorbises que plantega esti mou d'editar: «Alcontréme col problema de qu'esta plataforma anguañu nun tien soporte específicu pal asturianu, pero vi nello la posibilidá de facelo billingüe como los poemarios y tamién la d'ufrir una versión n'inglés. Ente les ventayes ta'l que la impresión ye a demanda, nun tienes d'invertir de primeres, ye fácil editar y tienes un escaparate mundial mui grande», asegura.

Tocante a la nueva novela, resalta que la illustración ye obra del so fíu Nel y, en cuantes al so propósitu, ye'l de que '¡Espetaos!' seya la primer entrega d'una serie abierta a nuevos títulos. «Esta historia entama con una nave espacial que s'espeta y cai al mar. Cuando la tripulación sal y dispérsase, van alcontranse con distintos seres humanos y diverses situaciones. La idea ye que cada llibru cuente la historia de caún de los tripulantes y cómo van xuntándose otra vuelta. De metanes van vivir unes cuantes aventures con sorpreses inesperaes de toa mena. Cuido que puede ser una serie perprestosa pa tola familia na que se xunta la ciencia ficción cola comedia o la imaxinación», desvela.

Sela cuida qu'esta apuesta pola narrativa d'entretenimientu ofrez unes perspectives que pueden enanchar l'ámbitu de llectores na nuestra llingua: «Lo que toi intentando ye abrir nuevos campos con una lliteratura más 'llixera', por dicilo asina, pa qu'al traviés de la fantasía, la ciencia ficción o l'humor algamen a más xente y valga pa demostrar que n'asturianu puede escribise de too. La mesma llingua había ser pa nós una imaxe de marca mui potente y por eso paezme importante da-y visibilidá. Inda esti llibru ta en castellanu y n'inglés al empar, la mio llingua ye l'asturianu, escribilo nella pa mi ye fundamental», confiesa.

L'algame d'un públicu más ampliu ye ún de los enfotos qu'envereda'l llabor de la escritora de cuantayá y ente los sos proyectos creativos ye bien conocíu'l que la xunta col cantautor Luis Núñez. «La música empata perbién cola poesía y ye un mediu con un potencial bien grande. Lo que faigo con Luis ye sofitame na so música y nos estribiellos qu'él canta pa recitar la mio parte, dramatizándolo y meciéndolo con una especie de monólogos de situaciones cotidianes. Ye una manera d'atrayer a xente diferente y amosar que la poesía tamién puede ser divertida formando parte d'un espectáculu que guste a tolos públicos», apunta.

Mentantu espera l'acoyida de la so última novela, Sela sigue a trabayar en nuevos entamos: «Tengo preparaos pa espublizar un par de poemarios y una novelina. Tamién un proyectu pa la reciella inspiráu nesti llibru que voi facer con Acuto Xuegos nun formatu asemeyáu al d'aquella collección 'Escueye la to propia aventura' y pa que los nenos puedan ellaborar les sos histories. Parezme que puede ser una cosa guapa», anuncia la creadora, una de les más actives del panorama asturianu.

Temas

• Alitar Asturies