El tesoru documental del padre Galo al algame de toos

Nu me esqueizades nunca del todu,/ que téamus cerca,que téamus llonxe:/ ya estus versus guardade en memoria/ dun probe muy triste que venu ya foise». Con eses palabres sencielles dexaba'l Padre Galo, Fernán-Coronas (1884-1939), el so mensaxe a la posteridá -cásique un epitafiu- na dedicatoria del so 'Viacrucis valdesanu'. Ochenta y cinco años después de la so muerte nel hospital-asilu de L.luarca, sicasí, la so figura y el so legáu llonxe de perdese nel escaezu constitúin ún de los campos más granibles de la investigación filolóxica asturiana de les últimes déquedes, con trabayos o publicaciones dedicaos a recuperar una xera intelectual tan descomanada como bayurosa pal conocimientu de les nuestres lletres na dómina moderna.

El llogru más ambiciosu y útil nesi rescate de la so obra ye, ensin dulda, el 'Proyectu Fernán Coronas' entamáu pola Fundación Valdés-Salas col fin d'axuntar y dixitalizar nuna base de datos tol material del archivu personal del escritor, conserváu hasta güei n'estremaos fondos. Esti miércoles presentábase nel Aula Magna de la Universidá d'Uviéu el resultáu d'estos trabayos y la so puesta en rede na páxina web de la Fundación, onde puede consultase dende agora n'accesu llibre.

Un conxuntu de 25.877 documentos de diversu natura y temática formen esti archivu abiertu a investigadores y al públicu en xeneral. Clasificáu en siete bloques que guíen al usuariu sobre'l calter de los documentos ufiertaos en caún d'ellos, el fondu reuníu non solo ufierta material d'enorme interés pal estudiosu de la so obra y de la cultura asturiana sinón que da una visión global de les esmoliciones, desvelos o avatares cotidianos que marcaron los trabayos y los díes del Padre Galo. El retratu del escritor que se puede reconstruir con toos esos fragmentos de la so biografía dexa entever una figura bramente fascinante. Les estrecheces económiques nes que se desenvolvieron los sos últimos años y la humildá escoyida pol propiu fraile oblatu acordies col ideariu cristianu faen xusta la so autodefinición como esi «probe muy triste que venu ya foise». Dellos apuntes y papeles conservaos nel fondu documental de la Fundación Valdés-Salas dan preba d'ello, como'l so mesmu final nel hospital de caridá lluarquín. Esa probeza material contrasta cola incomensurable bayura del so llabor intelectual, la d'un humanista de fonda formación y en contina inquietú por afondar o algamar nuevos saberes nun abanicu (un 'vaniellu', diríemos cola so propia espresión) que s'espandía dende los conocimientos de la más alta cultura a la cultura popular de la so tierra.

Al través de los documentos salvaos nos archivos particulares qu'integren la base de datos (los pertenecientes a Germán Fernández, Jesús Menéndez Pelaez, xunto los tres depositaos nel Ridea: Modesto González Cobas, Oliva Avello y Teresa Méndez, amás de los que calteníen María Luisa Gutiérrez Rodríguez y la Sociedá Popular La Regalina), podemos siguir les sos indagaciones filolóxiques alrodiu de la llingua asturiana y del dominiu astur-llionés, con recoyíes de léxicu en trabayos de campu o notes etimolóxique; tamién los sos apuntes pa proyectos como'l d'una gramática o un diccionariu de la rima. Ún de los corpus más resaltables ye'l de la so poesía n'asturianu y les abondes traducciones que fexo a la nuestra llingua de testos en llingües como alemán, francés, inglés, húngaru, catalán, hebréu, llatín, griegu clásicu, gallegu, xaponés o chinu. Xunta ello tamién la so obra en castellanu, llatín y otros idiomes, o apuntes d'estética, métrica y versificación.

Especial interés tien tamién el bloque dedicáu a la cultura popular, cola recoyida de refraneru, lliteratura oral o los bocetos del 'Amosadoiru valdesanu', un proyectu de muséu etnográficu. Capítulu aparte y venceyao a estes caberes esmoliciones, son los dibuxos fechos pol Padre Galo nos que s'afayen paisaxes de la contorna de Cadavéu, dellos realistes y otros idealizaos con traces de la pintura xaponesa o china, diseños d'emblemes, ilesies, capielles o cases con singulares incorporaciones d'elementos de l'arquitectura popular como los horros (coronando les torres d'un templu, a la manera de les pagodes orientales, por citar dalgún de los más llamativos) y que representen un suxerente detalle del universu estéticu de Fernán-Coronas.

La correspondencia conservada del Padre Galo ye otra fonte d'información alrodiu del so periplu biográficu y de los sos relaciones personales. Nella, ente les abondantes confidencies qu'intercambia col so amigu y primer albacea, Casimiro Cienfuegos, documéntase la breve relación epistolar que caltuvo col poeta Pepín de Pría o la complicidá intelectual con Enrique Cangas, home de fonda cultura y falanxista destacáu, al que dedica un poema tres la so muerte nel asediu d'Uviéu. Por una carta de Cangas sabemos que va dir a visitalu a Cadavéu con Pachín de Melás y otros amigos. Un auténticu tesoru documental puestu agora al algame de toos.

Temas

• Alitar Asturies