Gigia nun ye Xixón

Nun documentu provisional del Conceyu de Xixón, relativu al usu y xestión del edificiu de Tabacalera como Espaciu de Cultura Contemporánea, prevése un «Espacio expositivo Gigia», dedicáu a la historia de Xixón: Xixón romanu, Xixón modernu y Xixón industrial. En testu xustificativu fálase del castru orixinariu de Nóega, en La Campa Torres, y darréu lléese: «Con la romanización, Noega [ye esdrúxulo: Nóega] se convierte en Gigia, fundada en el otro punto estratégico de la Bahía de Gijón, en el Cerro de Santa Catalina».

Ta too perbién, a nun ser un detalle: Gigia nun ye Xixón. O dicho d'otra miente: nun hai nengún datu que nos permita albidrar que Xixón se llamara Gigia. La verdá ye qu'esto sábese de cuantayá, pero, por razones diverses, nun acaba de trescalar na cultura xeneral de la población nin de les nuestres élites. A ello hai qu'añadi-y la mala comunicación ente llingüistes y historiadores, y el resultáu ye esti.

Nel sieglu II d. C., el xeógrafu griegu Claudiu Toleméu rexistra una población llamada Gigia ―pronúnciase [guíguia], con «g» suave― nel territoriu astur, pero de los astures cismontanos, con unes coordenaes que correspuenden arriba abaxo cola población lleonesa de Cea, a orielles del ríu del mesmu nome (afluente del Esla) y cerquina de Sahagún. Por raro que paeza, la evolución de la palabra Gigia pudo dar como resultáu l'actual nome de Cea, pasando pela forma medieva Cegia, que ta documentada.

Yá a finales del sieglu XVIII dellos eruditos, ente ellos Xovellanos, nun-y daben munchu creitu a eso de que Gigia fuera Xixón. Los datos llingüísticos y históricos avalen esta desconfianza. La pura verdá ye esta: llamentablemente, nun tenemos nengún testimoniu de cómo se llamaba l'actual Xixón na dómina de los romanos. La primer documentación del nome de Xixón (na forma Jijione) ye del sieglu VIII, na época del Reinu d'Asturies.

Existen diverses hipótesis sobre cuál pudo ser el nome del que vien la palabra Xixón / Gijón. De Gigia nun pue venir, eso ta claro, non solo porque de Gigia nun pue salir fonéticamente Xixón / Gijón, sinón porque l'allugamientu xeográficu d'aquella antigua población ta mui lloñe, a 178 quilómetros tierra adientro. D'un puntu de vista llingüísticu, les hipótesis más creyibles apunten a un nome de persona, l'amu d'una tierra o uilla, que pudo llamase Gegionus (según Joaquín Manzanares) o Ieionius (según García Arias). Pela mio parte, apunto tamién la posibilidá de que Gigiónem, un deriváu de Gigia como topónimu que podía repetise en dellos llugares, pudo ser l'orixe del nome Xixón. Pero too esto son hipótesis.

A día de güei, el nome orixinariu que dio llugar a Xixón / Gijón ye desconocíu. Polo tanto, ye un error da-y el nome de Gigia a un espaciu espositivu del futuru centru cultural que se proyecta na Tabacalera. Por favor, ¿pa qué meter el cuezu si podemos nun lo facer?