La Biblia, ¿namás lliteratura? Una llectura dende la fe

El pasau 21 d'Abril presentóse la Biblia n'asturiano. Abondos artículos y reportaxes ficiéronse ecu de la noticia. La importancia del fechu nun ye menor. Trátase, nes pallabres del poliglota George Steiner -Premiu Príncipe d'Asturies de Comunicación y Humanidaes 2001-, del llibru que define, y nun solu nel ámbitu occidental, la noción mesma de testu.

Xuan Xosé Sánchez Vicente díxolo asina, «la Biblia ye, enantes qu'otres coses o además d'elles, un testu lliterariu» con «dalgunos detalles menores de gran calidá» y «d'una capacidá descriptiva (o inventiva) magnifica». Terminando cola invitación a lleela pues «ta enllena d'histories, d'observaciones, de detalles precisos y prestosos. Lliteratura del más altu nivel, nuna pallabra». Calificando la traducción fecha al asturianu como «una maravía, equilibrada ente lo coloquial ensin vulgarismos y un estándar ensin rebuscos».

Pa responder vamos siguir les pallabres y les reflexones del filólogu pola Universidá de Cambridge, S. Stuart Park qu'atopamos en dellos trabayos* y vamos centranos nel so análisis del rellatu onde Dios manda a Abrahán sacrificar al so fíu Isac qu'atopamos nel Xénesis 22 y que nos plantega dos cuestiones: la naturaleza de la narrativa biblica y la naturaleza del Dios del Antiguu Testamentu.

Stuart Park recoye el dibuxu de Dios que fae Richard Dawkins nel so llibru Espeyismu de Dios como un Dios celosu, altaneru, vengativu, xenocida, misóxinu, homófobu, racista, ifanticida y gafu. Pero ¿Ye asina?

Ye verdá qu'el mandáu que fae Dios a Abrahán estremez. Magar que´l narrador nun fala de la llucha d'Abrahán, podemos imaxinar la tormenta que produxere nel so corazón. «Los silencios dempués de preguntes espreses amosen too del drama qu'asocederá» diz Stuart Park.

Los trazos narrativos pa dalgunos son escuetos, parcos y primitivos, pero -recoyendo les pallabres del filólogu Erich Auerbach- «les figures tan trabayaes namás naquellos aspeutos d'importancia pa la finalidá de la narración, y el restu cincase atapecíu; namás los puntos cimeros de la aición tan acentuaos, y los intervalos vacíos; el tiempu y el llugar son inciertos y hai que figurarselos; sentimientos e idees afinquense mudos, y tán suxeridos namás que por medies pallabres y pol silenciu; la totalidá, dirixía hacia un fin con alta y ininterumpida tensión, y, polo mesmu, tantu mas unitaria, cincase misteriosa y fondera».

«Lleer la Biblia ye facelo como con cualquier llibru. Ello ye, suponiendo la so unidá temática». Pero nun podemos quedanos cola llectura filolóxica pura, según la intención del autor inicial, como si'l testu y el contestu posteriores nun aportaren sentíu (Alonso Schökel). Stuart propón qu'Hebreos 11.17-19,

«Pola fe, Abrahán, puestu a prueba, ufriendó a Isac y preparóse pa sacrificalu, a elli, el so únicu fíu, anque recibiera la promesa, na que se-y dixera: Isac va afirmar el to llinaxe. Porque pensaba que Dios tenía poder pa resucitar los muertos, polo que tamién recibió esto, por dicilo asina, como un símbolu»

«desvélanos les claves de la fe d'Abrahán, y llévanos al alcuentru de lo íntimo de la psicoloxía, los sentimientos, la llucha y drama del sacrificu d'Isac, al empar qu'invítanos a que, lleendo entellínees, seamos quien a poner a prueba les intenciones del nuesu corazón». Ye asina que «la Biblia, lo mesmu que la vida qu'ofrez, pidenos cuentes, invitanos a la decisión».

Too ello ensin olvidar lo mas propio y carauterístico de la estructura lliteraria de la Biblia: la tipoloxía. Que según el filólogu por Oxford, David Burt, nun ye namás un mou determináu d'ordenar les pallabres; ye sobre too una singular conceición de la historia. Revela'l so sentíu fonderu. Los socesos históricos antemanen los que tan por asoceder y nos qu'algamen el so cumplimientu y destín final.

«Asina'l socesu de Moriá fálanos de Xesús, y lleíu dende Xesús los sos detalles algamen un relieve mayor tovía. Prefigura'l drama de la Cruz».

La Biblia, colos sos rellatos, refierse a fechos, conceutos y sentimientos; faélo por mediu d'una rede metáfores, símbolos, tipos que converxen siempre en Cristo. «La Biblia nun ye alegoría, un mundu simbólicu namás. Nun ye un llibru autoreferente, un círculu zarráu. Ta enraigonada na historia real y la so estructura tipolóxica encarnase nuna persona histórica, Xesús de Nazaret y la so obra, revelando la historia de la salvación». Dios dexa de ser metáfora, «fósil de la gramática», pa dase a conocer en Cristu desapaeciendo la contraposición ente'l Xesús de la historia y el Cristu de la Fe. Y dende esa perspeutiva entendemos el carauter amorosu y misericordisu de Dios:

«Elli, que nun perdonó -φεἱδομαι mesmu verbu en griegu qu'usase en Xénesis 22.12 y 16- al so Fíu, sinón que lu entregó en favor de toos nós, ¿cómo nun nos lo va dar too gratis [bondá nun merecida]?» Romanos 8.32

Temas

• Bable