La Llaboral acueye el domingu la gala Camaretá
P. A. M. E.
Viernes, 10 de noviembre 2023, 18:55
El Teatru de La Llaboral de Xixón va acoyer esti domingu 12 la gala final del XV Premiu Camaretá al Meyor Cantar en llingua asturiana. La cita ye a les 19 hores, con entrada llibre -previa retirada d'invitación- y nesta ocasión el públicu asistente va tener la oportunidá de contemplar en directu un auténticu cuartetu de luxu de la nuestra música, al empar qu'una bona esbilla de la calidá y diversidá nes que se nutre la escena asturiana nun momentu especialmente duce como amuesa l'últimu Premiu Nacional na categoría d'Otres Músiques otorgáu al artista uveín Rodrigo Cuevas, qu'algamó tamién el gallardón de 'Camaretá' na edición de 2020 pol so cantar 'Rambalín'.
Dos nomes ya consagraos y con una sólida trayectoria de proyección esterior, la cantante Marisa Valle Roso y el gaiteru José Manuel Tejedor van competir nel escenariu con entrambes propuestes del talentu emerxente asturianu, la banda folk Alienda y la multinstrumentista Vero Rubio. Los ganadores de l'anterior edición, el conxuntu Algaire, van completar la gala con una actuación especial nel mesmu marcu nel que llevaron el Premiu Camaretá cola so composición 'Coral y maera'.
Los cuatro finalistes lleguen a esta gala con cantares de bien estremada fechura y caún d'ellos una preba del so particular sellu musical. Asina, la llangreana Marisa Valle presenta 'Tonada', una potente revisión del xéneru nel qu'empezó, compuesta por ella mesma ya incluida nel so últimu álbum 'Lo fugaz'. Tejedor, failo con 'Les tos nales', un tema intimista con lletra de Gema Fernández qu'interpreta con Loreto Suárez nel so recién discu 'Lluz'. Mentantu 'l grupu Alienda, opta al premiu con 'Zanca de cabra', un cantar escritu por Roberto González-Quevedo pal so trabayu de debú, tituláu como'l propiu conxuntu. A la fin, la canguesa Vero Rubio, compite con una composición propia 'Dixo miou padre', tan singular como'l so estilu personal.
