Uviéu Beach

Ordenando coses per casa doi col proyectu de playa pa Uviéu. Ríome solu. Qué coses. Como pasa'l tiempu. En nada van cumplise 30 años d'ello. Que tuvo un mini proyectu pa respaldala, pero qu'enxamás pasó d'idea. D'ocurrencia, podría dicise. Pero una ocurrencia con una pequeña hestoria detrás. Un productu creáu pal públicu uvieín. Xente mui avezao a aplaudir ocurrencies. Xente recio, que se puen tar riendo d'ellos a la cara y enxamás perderán la reciúra.

La carpeta del expediente sigue lluciendo na portada'l títulu 'Uviéu Beach'. Como sarcasmu pequeñín. Yeren los años de Miami Beach y de Miami Vice. Compréndase. El títulu correspuéndese a que yá me facía muncha gracia d'aquella. Doime cuenta que, agora mesmo, me la sigue faciendo. Cola carpeta vacia, ensin más nada que fueyes en blanco, visitamos la pequeña cuenca del ríu Gafu, onde se proyectaba la playa. El nome ya lo diz too. Polo menos n'asturianu. Gafu ponse lo mancao cuando s'infesta. Un ferida, una rozaúra. Gafu ponse'l perru que protesta por too. Y gafu ye'l paisanu que-y pega al perru porque se pon gafu. Como gafa se pon la mar cuando anuncia galerna. Y, como non, un asuntu que se pon gafu ye que ta claro que nun va salir p'alantre. El meyor exemplu fue esta playa. Esta ocurrencia de playa.

El contestu yera'l contestu. Yeren los meses del catastrazu. Les protestes yeren continues. La prensa dába-y a muerte al alcalde. La solución, como siempre ye típico n'Uviéu y en tantos otros sitios d'Asturies, pasa poles ocurrencies. Más que nada si les ocurrencies s'acompañen con una doble páxina de publicidá institucional. Asina, el proyectu Uviéu Beach quedó guapísimu nel anunciu. A colorinos d'acuarela. Con palmeres y setos, zona d'hamaques, chiringuitos, barquinos y embarcaderu, garita pa los de salvamentu, puestín de la Cruz Roxa, xente en bañador, muncha arena y un sol esplandiente.

Almuerzo al día siguiente en Cimavilla, detrás de la Casa Conceyu, Camín de la catedral, nuna terracina. Nun se falaba d'otra cosa. Esa yera la idea. Xente a favor y xente en contra. Como tien que ser. Pero yá naide falaba del IBI. Nin nos díes siguientes. Comentarios de tou tipu. Entrevistes a tou quisqui. Y más y más publicidá. Y más columnes. Otru motivu d'enfrentamientu con Xixón. Y los de Xixón, que son como los d'Uviéu col culu moyáu, creyéndolo too. Anque agora se rían toos muncho d'ello. Pasando'l tiempu toos nos reímos.