Esther García López asoleya dos títulos nuevos

P. A. M. E. L'azar editorial fai que lleguen cásique al empar a los escaparates de les llibreríes dos nuevos títulos de la presidenta de l'Asociación d'Escritores d'Asturies, María Esther García López. El primeru ye'l poemariu billingüe 'Andanciu/Andancia' (Trabe), escritu metanes la pandemia y reflexa en palabres del so prologuista, el tamién poeta Aurelio González Ovies: «Una dómina d'asfixa, de pensamientos sinceros, d'unos meses de desasosiegu, pero, delantre too, d'un paréntesis onde l'amor, como'l de Jaime Gil de Biedma, alendó xazmines y alelíes, nueches d'entusiasmu y otres de velea. L'amor palpe. L'amor quema. L'amor, equí, inflama, versu a versu en cada páxina».

La otra novedá qu'ufierta l'autora valdesana ye inda más lluminosa y empobinada a los primeros llectores, un xéneru al que tien dedicao bien de vagar na so obra. Ye l'álbum infantil 'L'efafante Tante' (Pintar Pintar), editáu n'entrambes versiones n'asturianu y en castellanu. Nél nárrase la hestoria d'un grupu d'animales camín de la xungla a la gueta d'una vida llibre y xusta. Tante, fartucu de vivir nun circu, decide marchar y piensa en facelo xunto a les sos amistaes y otros animales qu'alcuentre pela ruta. Illustráu por Ester Sánchez, el llibru ye, al mesmu tiempu, un cuentu y una obra teatral, cola particularidá de tar cuntáu en versu.

Temas

• Alitar Asturies