Esti viernes, na Llaboral, Premiu Camaretá al Meyor Cantar

Esti viernes a les 19 hores el Teatru de la Llaboral en Xixón acueye la Gala Final del Premiu Camaretá al Meyor Cantar en Llingua Asturiana y Eonaviegu. Nesta ocasión, el certame entamáu pola Conseyería de Cultura, algama la so decimosesta edición y va ufrir les actuaciones en directo de les cuatro propuestes finalistes: Ferla Megía, La Bonturné, Héctor Braga y Susana Gudín. Al empar la gala va cuntar nel escenariu cola participación de la cabera ganadora, la música canguesa Vero Rubio. La entrada al actu ye de baldre, previa retirada de la invitación.

Los cantares que concurren a ser el meyor nes nuestres llingües de 2024 son 'Odisea la nuí' del cuartetu xixonés La Bonturné, una formación singular nel panorama de la música de raigañu tradicional y abierta a nueves sonoridaes que ta integrada por Merce Santos (zanfona), Santi Caleya (saxo sopranu y gaita asturiana), David Varela (acordión diatónica, voz y percusión) y David Casillas (contrabaxu). Al so llau, 'Contigo' de Susana Gudín, una artista multidisciplinar que tien empobinao la so carrera del cantu líricu al metal rock o a la danza. El tercer candidatu ye Héctor Braga col so tema 'Llobatu', ún de los recienes del multinstrumentista y etnomusicólogu llangreanu. Y completa l'apuesta, 'Medrana a medrar' de Ferla Megía, un talentu emerxente que fusiona tradición y soníos electrónicos.