«L'escritor tien que radiografiar el mundu nel que vive»

José Ángel Gayol (Mieres, 1977) ye un autor que tien cultivao tolos xéneros. El so últimu llibru 'El silenciu invisibe' foi premiu Fuertes Acevedo d'ensayu.

-¿Chocó-y recibir un premiu de narrativa por un diariu?

-Ye una apuesta interesante del xuráu que pue abrir sienda pa que los autores n'asturianu se sientan llibres d'escribir lo que-yos peteza. Ya la mesma editorial lu publicó nuna colección de narrativa con aciertu, porque tien esi componente aunque tenga otros más ensayísticos.

-¿Foi una intención consciente o foi surdiendo?

-A finales del XX amplióse'l conceptu de narrativa más allá de la novela canónica, dende la lliteratura d'autoficción o n'abonda de la que se fai agora la presencia del yo, ficcional o real, ye palpable. Vila-Matas, García Martin o Xuan Bello faen una narrativa mui personal, na que'l yo conviértese nun personaxe y el diariu ye un xéneru afayadizu.

-La so primera persona fala tamién d'un 'nós'.

-Tenía claro que quién soi yo o lo que fago diba interesa-y poco al llector. Si creía que podía tener daqué interés pa él lo que me pasa a min en relación al esterior, al mio rodiu o que pienso a propósitu d'ello, de lo que lleo. Pero siempre dende fuera, como observador que busca esa complicidá col llector, que se sintiera partícipe de les mios reflexones o duldes de lo que ta sucediendo na lliteratura asturiana. Como escritor creo que ye importante reflexonar tanto sobre lo más cercano como sobre lo más llonxano, radiografiar el mundu nel que se vive.

-¿Falta autorreflexón na lliteratura asturiana?

-El cómo escribimos, l'oficiu en sí o determinaos problemes a los que nos enfrentamos ye un debate qu'echo de menos y parezme qu'hai incluso una cierta autocensura, mieu a tocar dellos temes: si dices dalgo que nun sea bondadoso vese como que trates de pisar dalgún callu. Creo intereseante plantear si nos lleemos o non. Ye difícil tratalo, hai xente pa la que val más nun falar d'ello, dexalo como ta.

-¿Y qué virtúes acolumbra nos autores actuales?

-La diversidá y una ampliación temática. Salimos del pueblu o de la señaldá por ciertu pasáu d'Asturies, pienso en noveles como les de Paco Álvarez o David Artime. Eso ye bien interesante lo mesmo que l'atrevimientu formal de la nueva poesía. Echo de menos más ensayu y de teatru, tamién novela.