Actu nel Filarmónica y homenaxe a Xosé Bolado

L'Academia de la Llingua Asturiana va cellebrar el XLIII Día de les Lletres Asturianes el prósimu viernes 6 de mayu col so ya tradicional actu institucional d'acoyida a nuevos miembros y que tien como exe central el discursu del so presidente, Xosé Antón González Riaño, pa facer repás de les esmoliciones de la corporación llingüística énte los acontecimientos socedíos a lo llargo del añu no tocante a la situación social y cultural del nuestru idioma. Nesta ocasión la ceremonia va entamase nel Teatru Filarmónica d'Uviéu a les 12 hores del meudía y va cuntar cola actuación musical del grupu Misiva Punk Rock. A estremadura d'otres ocasiones, l'accesu al actu va ser namás al traviés d'invitación confirmada.

Los nuevos académicos que van ingresar na institución son Inaciu Galán, como miembru de númberu, y Lisardo Lombardía, como académicu honoríficu. Entrambos dos fueron escoyíos nuna xunta de l'Academia celebrada el pasáu 7 d'abril y a lo llargo de les sos respectives trayectories cuenten con méritos abondo nel so compromisu cola normalización de la llingua asturiana y la so visibilización social. Galán ye doctor en Filoloxía pola Universidá d'Uviéu con una tesis sobre la llingua asturiana nel franquismu, foi fundador y presidente de la plataforma Iniciativa del Asturianu, amás de desenvolver una activa carrera periodística en diversos medios y lliteraria como autor de varios llibros de poesía. Pel so llau, Lombardía, médicu de formación, foi hasta l'añu pasáu director del Festival Intercélticu de Lorient, participó na creación del colectivu etnográficu Belenos y del sellu discográficu Fonoastur. Tien la Medalla de Plata del Principáu d'Asturies, concedida en 2015, y la condecoración como Chevalier de l'Ordre des Arts et des Lettres de la República Francesa en 2021, otorgada como reconocencia al so llabor al frente del certame bretón .

Nel actu del Teatru Filarmónica, l'Academia de la Llingua va presentar arriendes l'últimu exemplar de la so revista Lliteratura que dirixe Marta Mori de Arriba. La entrega 38 d'esti monográficu de les Lletres rinde homenaxe al que fuera'l so responsable a lo llargo de venti años, l'escritor y académicu Xosé Bolado (1945-2021), amás d'ufrir una bona escoyeta de la creación n'asturianu actual con colaboraciones d'autores de tolos xéneros. Nesti especial, la propuesta principal dedícase al microrrelatu, con contribuciones de más d'una cuarentena de narradores de toles xeneraciones lliteraries: dende pioneros como Vicente García Oliva, Roberto González-Quevedo y Miguel Rojo a representantes de la segunda promoción del Surdimientu como Adolfo Camilo Díaz, Xilberto Llano, Aurelio González Ovies, Esther Prieto o Lurdes Álvarez, pa rematar coles últimes xeneraciones moces, dende Pablo Texón y José Ángel Gayol a Laura Marcos, Xaime Martínez y Blanca Fernández Quintana. Hai tamién secciones dedicaes a la poesía, con testos d'Alfredo Garay y Noemí González; narrativa, con David Artime, y ensayu, col trabayu de Paquita Suárez Coalla 'Lliteratura neuyorquina con acentu asturianu'. La crítica ocupa otra bona parte del espaciu de la publicación con reseñes de les novedaes editoriales que fueran asoleyándose de 'Lletres' a 'Lletres'. El tributu al recordáu Bolado ta presente en tola publicación dende la recreación de la portada del númberu 1 de Lliteratura, diseñada entós por Jorge Fernández León y fecha agora alrodiu d'ella por Marcos Martínez 'Indelendo', hasta l'obituariu que la pieslla con collaboraciones de Paz Fonticiella, que vierte el poema 'Un gatu nun pisu vaciu' de la Nobel polaca Wislawa Szymborska, y artículos evocativos d'Alejandro Fernández-Osorio, Cheni Uría y Jordi Doce.