Felicitar les Pascues

É STES van ser les primeres Pascues recesives, o hasta depresives, que vemos dende cuantayá. Nun vendría mal paranos a pensar que munches de les meyores creaciones humanes preñen y paren en tiempos de tribulanza y non, precisamente, en tiempos de bayura. Nun ye que queramos la desgracia ayena, nin muncho menos la nuestra, pero la historia ta astrada de forfugos enormes de los que salieron los protagonistes, con munchos trabayos, ye verdá, pero más grandes y más humanos. La conseyera de Bienestar Social y Vivienda, Noemí Martín, d'estrene esti día, anunció que la seña d'identidá del departamentu será l'austeridá. Ún, inocente, pregúntase si eso significa qu'hasta esti momentu l'austeridá nun figuraba ente los pegollos de l'acción d'esi negociáu gubernamental, lo que provoca tremesina, o si ye namás una declaración populista en viendo que lo único que nos queda yá por ver ye que caiga'l cielu y s'espete pelos bárganos.

Va pa cinco años, falten unos díes namás, la madre de la conseyera Martín, daquella la conseyera Laura González, felicitó les Pascues a los rapazos asturianos asegurando que taben refalfiaos. «Los rapazos asturianos tán refalfiaos», rezaba un titular que tuvo un estrellatu efímeru en boca de doña Laura. Abulta que ye una tradición familiar inaugurar los mandatos col enclín moralizante que la izquierda más izquierda s'atribui a ella mesma, y, asina, la madre conseyera llamó en so día a l'austeridá xuvenil porque la mocedá abusaba de móviles, coches y ordenadores, y la fía conseyera, güei, anuncia l'austeridá colos recursos públicos porque la recesión dexa l'arcón del presupuestu galdíu, y pide un bon exemplu de los políticos. Tien razón la conseyera d'IU, porque la recesión, y nun digamos nada la depresión, nun hai otru xeitu de pasala como nun seya cola sobriedá, anque depués esti deseyu fundacional se compadeza mal con que'l presupuestu de Bienestar Social medre'l doble de lo que crez el de tol Gobiernu en xunto. Gastar más coles persones que menos pueden, y especialmente coles que nun pueden algamar a la dignidá humana, ye siempre una política emponderable. Otru asuntu ye que d'onde nun hai nun se puede sacar y que, colo que va facer falta pa que los débiles, que medren estos meses alarmantemente, tengan un bon pasar, va resultar que los mesmos euros nun van suplir, cola fía conseyera, nin la mitá de lo que suplíen cola madre conseyera, porque aquella tenía munchos menos menesterosos a los qu'atender.

Tamién ye verdá que, como diz Noemí Martín (EL COMERCIO, 6-12-2008), gastando meyor puede ún facer más. Pa espoxigar nun fai falta siempre tener más, lo que fai falta ye saber emplegar meyor lo que nos tien tocao en suerte. Pa exemplu, Asturies, estación términu d'incontables 'fondos', mineros, europeos, estatales, y otros hasta ensin apellíu, que lleva trenta años de Constitución perdiendo los trenes que pasen a la so vera. Si otros lleguen a tener la mitá menos de les oportunidaes que nos dieron a nós, y nun me refiero namás a los industriosos catalanes o a los emprendedores vascos, valme con citar cualquier otra identidá española, a esti altor nun hai quien los conoza y tenemos que tratalos d'usté.

Arrimámonos al momentu en que los conseyeros, directores xenerales y xefes de departamentos varios sienten la obligación del calendariu y manden a ciudadanos ya interesaos una felicitación de les Pascues y un deseyu pal añu entrante. Perriba de delles intenciones modernizantes, la mayoría conserva intacta la fórmula tradicional d'augurar prosperidá y bayura pal añu que ñaz. Esta vegada puede que se vea más conveniente que nunca convocar a los espíritus, en viendo los desastrosos gráficos macroeconómicos que s'asoleyen a diario. Pero como tamién ye un vezu bien espardíu acompañar les «Felices Pascues y bayurosu 2009» con una poesía o sentencia, propóngo-y a la conseyera, meyor, una anécdota, pa que l'axunte, a ser posible n'asturiano ya inglés, a la felicitación: Yera ún que-y contó a un amigu qu'él tuviera depresión, y que-y encamentaron que, pa combatila, practicara la meditación. ¿Y la meditación curóte la depresión?, entrugó l'otru. Non, retrucó aquél, pero agora yá nun m'importa tar deprimíu.