Cultura entama los sos premios lliterarios
El prósimu 26 d'abril fina'l plazu de presentación d'orixinales pa los premios lliterarios en llingua asturiana qu'entama añalmente la Conseyería de Cultura y de los que se pueden consultar les bases publicaes nel BOPA con fecha de 27 de marzu. Respective a convocatories anteriores son delles les novedaes que se recueyen nesta ocasión, la más resaltable cinca al gallardón empobináu hasta agora a la Lliteratura Infantil y Xuvenil, el 'María Josefa Canellada', que d'agora pa en delantre va dedicase cada añu a una sola de les dos modalidaes y que en 2024 va ser la d'obres destinaes al públicu infantil.
Nel premiu decanu de los convocaos pol Principáu, el Xosefa Xovellanos de novela, algama la so edición 45 y puede optar a él cualquier autor nun siendo que ya lu ganara l'añu anterior. Les obres, inédites y non premiaes n'otros concursos, serán d'estructura y temática llibres, con una estensión mínima de setenta y cinco páxines a doble espaciu, con lletra de 12 puntos Times New Roman (o asemeyao) y el gallardón ta dotáu con un importe de 6.000 euros.
El XXX Premiu de Poesía Xuan María Acebal, ábrese d'igualmiente a la participación de cualaquier persona, tamién cola escepción de nun lu ganar na última edición y de que la obra presentada nun algamara nengún otru concursu. La estensión mínima márcase en venticinco poemes y de ser una cantidá inferior, con un llargor de cuatrocientos versos. L'importe del premiu va ser tamién de 6.000 euros.
Dotáu cola mesma cantidá y con idéntica escepción de que nun pueden concurrir a él los ganadores de la edición pasada nin presentase una obra ya merecedora d'otros gallardones, convócase'l III Premiu Máximo Fuertes Acevebo d'Ensayu. Nesti casu la estensión mínima de los trabayos ye de cincuenta páxines a doble espaciu y lletra de 12 puntos. Igual de bases comunes ufierta'l citáu Premiu María Josefa Canellada que na so edición 17 resérvase a obres de lliteratura infantil con una estensión másima de treinta páxines en cualaquier xéneru y en tratándose de poesía, con un másimu de venticinco poemes y un mínimu de 250 versos.
La 16 edición del Premiu Alfonso Iglesias de Cómic, comparte bases coles ya citaes convocatories y la estensión mínima del orixinal ye de cincuenta páxines, inda tamien se contempla la posibilidá de facelo con un mínimu de quince y una declaración responsable pa unviar el resto enantes del 2 de diciembre. Con un importe menor, de 3.000 euros, preséntase el IV Premiu Enriqueta González Rubin de Narrativa Moza, empobináu a autores menores de 31 años y al que pueden concurrir con noveles breves o llibros de cuentos y una estensión mínima de cincuenta páxines. El II Premiu de Testos Teatrales Pachín de Melás ábrese a obres orixinales que puedan representase con una duración d'ente 50 a 90 minutos. Y a la fin el IV Premiu Florina Alías de Traducción va reconocer a la meyor obra vertida a l'asturianu o eonaviegu en 2023. Entrambos dos tan dotaos con 6.000 euros caún.
