Nueves lluces p'allumar la dialectoloxía del sieglu XXI
El Campus d'El Milán acueye el congresu del seminariu de Filoloxía Asturiana 'Una revisión de la variación xeolectal del asturianu', con homenaxe al profesor Ramón d'Andrés
Güei continuen y piesllen na Facultá de Filosofía y Lletres del campus d'El Milán les xornaes 'Diferencies na inmensidá d'una llingua. Una revisión de la variación xeolectal del asturianu', qu'entama el Seminariu de Filoloxía Asturiana en collaboración colos departamentos de Filoloxía Española y de Filoloxía Románica y Clásica, col apoyu d'Estensión Universitaria y la Conseyería de Cultura del Principáu. L'oxetivu del congresu ye abordar les variedaes de la llingua asturiana a la lluz de les nueves conocencies y tecnoloxíes, cuntando tamién coles aportaciones nel campu de la dialectoloxía d'investigadores que trabayen en diferentes universidaes españoles y europees.
En palabres del so coordinador, Ramón d'Andrés Díaz, l'oxetivu del congresu ye una puesta al día de los estudios de dialectoloxía, una disciplina de la qu'apunta, «hai una tradición llarga nel casu asturianu que naz con Ake W. Munthe y Menéndez Pidal a finales del XIX y de la que nosotros nos sentimos herederos. Nel sieglu XXI les metodoloxíes d'investigación o conceptos científicos sobre'l tema van cambiando y mostrar como los tamos adoptando ye'l sentíu d'estes xornaes». Nelles, ayer, especialistes en dialectometría como l'autor de la conferencia inaugural Gotzon Aurrekoetxea (Universidá del País Vascu) espunxeron los sos estudios de les variaciones llingüístiques siguiendo esti metódu matemáticu-estadísticu o sobre les aplicaciones dixitales en dialectoloxía, como Johnatan E. Bonilla y Miriam Bouzouita (Universidá de Berlín). Ya investigadores asturianos como Fernando Álvarez-Balbuena o Miguel Rodríguez Monteavaro, plantearon, respectivamente una revisión de los criterios de zonificación dialectal propuestos nos años 50 por Diego Catalán pal asturiano occidental y amestaron datos nuevos al Estudiu Llingüísticu del Centru-Occidente Asturianu. La xornada remataríala el profesor d'Andrés Díaz (Universidá pa tratar de 'El mitu de los bables: significáu y funciones d'un tópicu ideolóxicu'.
Alrodiu de la so esposición, el filólogu y académicu, desplicaba a esti diariu que «ye una cuestión que naz nos años 80, nes amarraces sobre la normalización del asturianu, que ye un fechu sociopolíticu, non llingüísticu y sobre lo qu' hubo posiciones enfrentaes. Ún de los sectores optó por adoptar una postura que yera purametne ideolóxica pero intentando instalala como ortodoxia científica, una impostura que se descubre mui fácilmente y que nun tien un pase en llingüística». Nesi sen, Ramón d'Andrés remembra que «si esamines la tradición filolóxica asturiana dende'l s. XIX, Menéndez Pidal y la so escuela ven l'asturianu como una unidá diversá, nada fuera de lo que se ve n'otres llingües. Impulsores del discursu de 'los bables', como Jesús Neira o Emilio Alarcos tienen una primer época na que siguen la estela pidaliana: esiste l'asturianu que tien variedaes, hai testos onde claramente esponen esa visión. Pero nos años 80 llancen una ofensiva, xunta non llingüistes como Gustavo Bueno, que consiste en que nun se puede falar del asturianu sinón d'una multitú de bables, inconexos ente ellos y que nun formen un xeotipu llingüisticu. La so impostura ye que planteen una cuestión puramente política disfrazándola de ciencia, un discursu que col tiempu decaye, anque agora intenta resucitase dende ciertes minoríes polítiques».
Na xornada d'esti viernes Fernando Brissos (Universidá de Lisboa) va falar sobre l'espaciu hestóricu y la política del mirandés; Ruth Miguel (Universidá de les Isles Baleares) espondrá los sos ensayos sobre Intelixencia Artificial en xeollingüística y tres una proyección de muestres audiovisuales de fala popular de Ramsés Iglesies y Xosé 'Ambás', la sesión de tarde ufrirá entrambes comunicaciones sobre llingua, poblamientu y territoriu del xeógrafu Ícaro Obeso y de los hestoriadores Margarita Fernández Mier y Andrés Menéndez. La investigadora del CSIC, Pilar García Mouton pondrá la conferencia de clausura alrodiu la variación xeolectal del asturiano nel Atlas Lingüístico de la Península Ibérica (ALPI). N'acabando'l congresu va facese un actu d'homenaxe al profesor Ramón d'Andrés Díaz.
