«Los reis asturianos nun quixeron pasar del Duero nin de les llendes de Gallaecia»
Monchu'l cura. El sacerdote xubiláu y intelectual publica 'Astures gens Hispaniae', la obra de toa una vida d'estudiu críticu
Sacerdote xubiláu, intelectual y pintor, José Ramón García Fernández, Monchu'l Cura (Villaviciosa, 1936) acaba de publicar 'Astures gens Hispaniae. Iglesia local y nación histórica' (Trabe) un documentáu ensayu sobre'l legáu cultural de la nuestra historia y del papel de les ilesies locales na construcción de la Europa democrática y de la diversidá. Recién salida la segunda edición de la obra, fálanos d'ella cola claridá y llucidez que siempre lu caracterizaron.
–Tien dicho qu'esti ye un llibru pensáu y escritu a lo llargo de tola vida.
–Son asuntos a los que llevo dando vueltes munchos años. Ya nel Seminariu, alcuérdome d'Ananías Alonso, el primeru que nos dixo que lo de Santiago yera un cuentu. Al añu siguiente ya nun daba clase ellí. Y de Fernández Novalín, yera mui oficialista y casi me suspende porque-y dixe que nel momentu que la Ilesia pactó con Constantino el cristianismu perdió la so orixinalidá porque se sometió. A partir d'ehí empecé a tener munchu interés por estos temes, siempre con sentíu críticu.
–Y sobremanera por Asturies, lo más prósimo ¿non?
–Evidentemente. Veía que dende la escuela sabíamos la llista de los reis godos y nun teníamos idea de los qu'hubo n'Asturies. Enseñábente tolos rios d'España, les capitales y nun sabíes nada de la to tierra. Creo que yo fui consciente de verdá cuando morrió mio madre. Yera mui aldeana, cuando la llevé a vivir conmigo a Uviéu, la probina oyía la gaita y emocionábase. Correxíame porque yo falaba asturiano y dicíame: «Fíu del alma, parez mentira que tes estudiando y fales tan mal como yo». Fíxese lo que-yos metieron nel alma.
–Col so espíritu críticu figúrome qu'hebía muncho de la nuestra historia 'oficial' que-y rinchaba.
–Sí, hom, pero tabes un poco acomplexáu, dábate la impresión de que tabes fuera d'órbita. Hasta que descubres que nun yes tú precisamente l'equivocáu tardes muncho porque yeren ellos los que dicíen qu'eso nun valía pa nada, que lo importante yera la historia universal, como si lo inmediato nun tuviera valor.
–En plenu franquismu nel Seminariu, recalcaríen-yos bastante el 'espíritu nacional' y el dogmatismu.
–Na época que me tocó non tolos cures yeren iguales. Había uno vieyu, Florentino Arrojo, que cuando taben los obiespos en Roma nel Concilio, soltónos un día: «Los señores obiespos que vengan pronto, no vaya a ser que la gente se de cuenta de que todo funciona perfectamente sin ellos». Y otru, don Rosendo, nunes clases de socioloxía casi nos convence que'l comunismu yera la solución a tolos problemes. Después, pa minimizar el tema fue a Cuadonga a danos unes charles.
–¿Y usté cuando diba a Cuadonga vía ellí el berciu de dalgo?
–Non, non, yo la cuna d'España nunca la vi en Cuadonga. Lóxicamente porque yera imposible, si cuando yo fui tovía costaba trabayu llegar allá. Amás yo ya lleía coses y pensaba: «Qué va, esto nun pudo ser, ye una cosa simbólica». De Cuadonga, la batalla, nunca lo creí.
–¿Pero sí sentía qu'hebía ellí una sacralidá bien vieya?
–Evidentemente. Ya dicía que soi d'aldea y per San Xuan adornábense les fontes, yeren dalgo sagrao. Mio güela nun yera relixosa nel sentíu cristianón, pero creía nos muertos, a mi güelu ella dicía que cuando diba catar les vaques teníalu esperando a la puerta y que los difuntos andaben peles caleyes. Y el llunes de Pascua espetaba'l ramu na tierra y dicía: «Sali sapu, sali ratu, sali toda comezón qu'equí ta l'agua bendita y el ramu de la pasión». Eso ye celta, puramente celta, y vivilo yo.
–Trata nel so llibru de les comunidaes monástiques y una ilesia local d'una Asturies con muncho de pagana.
–Yeren comunidaes casi como les de los hippies, familiares munches veces. Aquella ilesia yera distinta de la que se creó na cultura greco-romana. El cristianismu, nos cuatro primeros sieglos, fue inculturizándose colos pueblos nos que predicaba. Non namás na doctrina, tamién na organización. Después impúnsose l'Imperiu. N'Asturies un personaxe importante fue Prisciliano. Pertenecía a una ilesia étnica y carismática. Había que liquidalu porque yera un peligru.
–Otru mitu que desmonta ye'l de la vocación reconquistadora del Reinu d'Asturies.
–Ye que los reis asturianos nun quisieron pasar nunca de lo que fuera la Gallaecia. Del Duero nunca pasaron, queríen mantener l'antigua tierra de los astures. Nos mesmos cronicones, que fueron mui adulteraos, cuando los normandos asalten les costes del norte, dicen: «Y después marcharon pa Spania». Y el cuentu de los visigodos. Los astures aborrecienlos. Son interpolaciones de la casa navarra pa lexitimase ellos y poder conquistar el restu la península.
–Pa la historiografía oficial l'arte y cultura d'esi periodu ye visigodo y mozárabe. Remembre la cruz que descubrieron va poco en Toledo.
–Eso son babayaes. Yo tuvi nel muséu arqueolóxicu de Copenhage y ta enlleno monedes árabes, ye como dicir que por eso tuvieron ellí los musulmanes. ¿Y qué ye eso de llamar prerrománicu al arte asturianu? Nun tien nada que ver col románicu, absolutamente nada. L'arte ye mui importante, la espresión del alma d'un pueblu y el nuestru ye personalísimu, lo cualo nun significa que nun tenga influencia de tolo que lu arrodiaba. Pero ¿mozárabe? Que lo demuestren: ¿ónde hai equí un edificiu mozárabe?
–El so ensayu remata con una vindicación del europeismu diversu y los derechos humanos.
–La cultura de los derechos humanos ye europea, tenemos ehí un humus de valores y tradiciones celtes, cristianes, racionalistes, de toa esa diversidá y el llibre pensamientu ye de onde puede surdir el progresu. Nos bulos de los dogmes y les ideoloxíes nun se va a nengún llau.
