«Nesti llibru amaño una espresión más concisa y depurada que l'anterior»
Laura Marcos lleva a les llibreríes dos títulos axuntaos nel tiempu: el poemariu 'Díes otros' y la reedición del volume 'Cuentos de ser y de tar'
PABLO A. MARIN ESTRADA
XIXÓN.
Martes, 29 de junio 2021, 04:25
Laura Marcos (Mieres, 1982), una de les voces emerxentes con más proyección na nuestra lliteratura ufierta anguañu nos escaparates de les llibreríes dos títulos que ... l'azar editorial xuntó nel tiempu: la publicación de 'Díes Otros', el poemariu col qu'algamó el Premiu Fernán Coronas en 2019, y la segunda edición del so volume de narrativa 'Cuentos de ser y de tar', entrambos publicaos col sellu Trabe.
Alrodiu del llibru nuevu, l'autora desplica que «ta mui pensáu y esistió primero como conceptu global pa dir armándolu colos poemes qu'escribí pa responder a esi conceptu. Caún d'ellos diba empobináu a cuadrar nuna de les tres partes nes que se divide». El filu conductor qu'amaña'l conxuntu ye, en palabres de Marcos, «la idea de una adaptación a un cambiu vital que vien de sópitu y mui radical respective al estáu de coses iniciales. Eso ye lo que marca la primer parte, 'La lluz robada', que puede interpretase en clave de la perda d'una relación o la muerte d'un ser queríu, y entronca col tema de la guerra y l'esiliu. Ye una vivencia de trauma y de duelu. La segunda estaya, 'L'agua turbio', ye'l momentu de superación d'esi primer momentu tan escuru, el reconocimiento d'una circunstancia nueva. Y la tercera, 'El son cambiáu', reconoz la posibilidá de crecer dende esa situación», desvela.
Tocante a les diferencies formales qu'estremen estos poemes de la obra anterior de la escritora, afirma que «tien poco que ver colo qu'escribiera enantes, una voz más averada a la oralidá y a la recitación nes timbes poétiques. Esta otra ye una poesía más concisa y los testos tamién bastante depuraos cásique a la mínima espresión, destilando tolo que pude la perspectiva hasta'l puntu de retorcer en dalgunos casos el llinguaxe con munches elipsis, llinies mui curties, a vegaes dexando una palabra o dos soles nel versu pa que tuvieren aire aquelles que me parecíen importantes. Ye una poesía abondo minimalista, por dicilo asina».
La coincidencia cola reedición de 'Cuentos de ser y de tar' ye especialmente gustosa pa Marcos por un llibru del que cuida que'l so ésitu cree «que se debió pola so llectura fácil, con diálogos mui allegaos a lo que se fala na zona centro y vieno en parte pol boca-oreya. Nun fice una revisión sustancial, pero emocionóme volver a estos cuentos», espresa énte la nueva vida qu'entama agora.
¿Tienes una suscripción? Inicia sesión
