«La xente ta viendo que la música tradicional puede disfrutase»
Folk. El tríu formáu por Elisabeth Montequín, Natalia Vega y Alba Menéndez celebren l'Amas al so discu 'Sutripar' reivindicando los sones de raigón de les muyeres
El grupu 6 Riales, algamaba na última edición de los Premios Amas el gallardón al meyor discu folk pol so trabayu 'Sutripar', un bon exemplu de cómo entienden la música de raigañu estes tres moces, la entreguina Alba Menéndez y les llangreanes Natalia Vega y Elisabeth Moontequín. Inda col contentu en cuerpu pola allegría d'esti reconocimientu al so álbum de debut, fálennos d'ello.
–¿Cómo reciben esti AMAS?
–Encantaes y agradecíes de que se valore'l nuestru trabayu. La verdá ye que lo nuestro vieno asina rodao, fuimos dexándonos llevar dende la formación del grupu y nun teníamos mayores pretensiones. Decidimos grabar el discu pa 'inmortalizar' un poco tolo que teníamos trabayao, ensin nenguna aspiración a nada. Por eso tamos mui emocionaes con esti premiu.
–¿Cuálu foi l'orixen del tríu?
–6 Riales nació del grupu de baille L'Enguedeyu de Lada pa una actuación puntual. Foi idea d'Elisa que les que tocábamos la pandereta formáramos un grupu de percusión, utilizando la cacía, amás de la pandereta y el panderu. Y d'esa actuación salieron más, viose peles redes, hubo xente a la que-y gustábamos. Y como nos había prestao tanto y tamién a la xente, decidimos siguir con ello. Cola pandemia quedó parao, quedamos nosotres dos, después xunióse Alba, y en septiembre del 21 actuamos en 'Al Resve' en Cimavilla con 'Sutripar y hasta güei. Tamos les tres encantaes.
–¿El repertoriu yera'l que trabayáben nel grupu baille?
–Salió pa esa actuación en Xixón, queríamos facelo enseñando la cacía: cuyares, llata pimentón, sartenes, llave y tabla de llavar y siguimos nesa llinia. Nos cancios escoyíos, a dalgunos damos-yos una vueltina , escribimos o tornamos dalguna lletra porque a veces les antigues nun nos dexen a les muyeres en mui bon sitiu, y nós lo que queremos ye disfrutar y pasalo bien. Les picaresques d'antes pero sin ofender, tenemos tamién composiciones propies y llevámoslo a una visión de la musica tradicional asturiana dende lo que ye la percusión y la cacía, anque nun renunciamos a la pandereta nin al panderu.
–Y como talu grupu de música tradicional ¿lo que faen ta pensao sobretoo pal baile y que la xente interactúe?
–Pal que baile, cante, participe, disfrute y tamién deprenda cosines: a veces hai reciella y enséños-yos qué yera una tabla de llavar. Aparte de visual, cada conciertu suele ser mui didáctico, amás de que la xente lo pase bien participando, el que sepa bailar y los que nun sepan tamién.
–Esa intención de facer música pa que la xente participe cobra pesu na música asturiana y tamién parez que se acueye igual de bien. ¿Venlo asina?
–Creemos que la xente ta abriendo los güeyos a que la musica tradicional nun ye namás eso que puedes oyer en casa nun discu, que puedes tamién tar disfrutándolo bailando un pasudoble, una xota, lo que seya. Ta empezando a cambiar esa visión, y la nuestra va per ehi, porque la música que se facía antes yera precisamente pa eso.
–Una tradición de muyeres y que 6 Riales reivindica con arguyu.
–Préstanos dar visibilidá a eses muyeres que ya nun tán. Hai tantes artistes que fueron anónimes, tolos cantares que nós canciamos compúnxoles dalguién que les tresmitió y gracies a esa tresmisión de xeneraciones, hubo quien pudo recoyelo después nun trabayu de campu. Ye un homenaxe a eses artistes que quedaron nel anonimatu y si güei vieren que se sigue cantando eso qu'elles un día conmpunxeron embaxo l'horru, prestaría-yos saber el legáu que dexaron equí. Y nes nuestres lletres tamién procuramos da-yos esa vueltuca a favor del empoderamientu de la muyer.
–Tamién na mesma actitú en directu acordies a ello ¿Non?
–Eso ye lo qu'intetamos tresmitir y parez que llega (Rises)
–¿Siéntense nel mesmu barcu qu'otros grupos de muyeres como Eva Tejedor y les sos pandereteres, Algaire, Tanxugueiras en Galicia?
–O Marta Elola y Fe Santoveña, el colectivu Muyeres que son pa nós un referente. Igual la diferencia con esos grupos ye qu'elles usen principalmente pandereta con otres percusiones o amestándolo con soníos más modernos y nós centrámonos no más antiguo, toos esos instrumentos que podíen garrase pa facer percusión, anque tamién podemos meter curdión, zanfona, cuernu. Tenemos la llibertá de nun siguir el patrón de naide y facer lo que nos preste, aunque nos pareza una llocura. Si gusta, bien y sinón, préstanos a nosotres. Y normalmente gusta.
