El xixonés Xon de la Campa gana l'Alfonso Iglesias de Cómic
M. Rojo
Xixon
Viernes, 2 de junio 2023, 01:27
La decimoquinta edición del Premiu Alfonso Iglesias de cómic n'asturianu reconoció anguaño'l trabayu de Xon de la Campa Valdés (Xixón, 1973) na so historia 'Misteriu nel soterrañu', que narra les andances del inspector Hevia nel París d'últimos del sieglu XIX. El xuráu del gallardón destacó «la corrección llingüística y la naturalidá de la llingua escrita que nun suel ser fácil de consiguir nesta modalidá lliteraria» y que sí llogra esta historia resuelta en llinia clara. L'autor cree que el so llibru ye «un homenaxe claru a la escuela franco-belga», y mira pa 'Tintín' como clara referencia. «Préstame mucho», reconocía. De la historia, «con asesinatu al principiu», diz que tien un xiru fantásticu al final que sorprenderá. «Anque ye una historia con asesinatu, ye pa tolos públicos. Busco entretener, nun hai más pretensión», cuntaba pocu depués de sabese ganador del premiu.
Xon de la Campa Valdés ye ilustrador diplomáu en Grabáu y Técniques d'Estampación pola Escuela d'Arte d'Uviéu. Ente los sos trabayos cúntense ilustraciones y portaes de llibros, cómics y tires en publicaciones periódiques como 'La Información del Bajo Nalón' o 'La Voz del Trubia'. El dibuxante xixonés ilustró y creó les portaes de títulos tan variaos como 'La Celestina', 'Drácula', 'Conan el Bárbaru', 'El gran llibru de la Mitoloxía asturiana', '1809. Cartes de la revolución de Trubia' o 'Llazarín de Tormes'.
El premiu ta dotáu con 6.000 euros y la publicación de la obra ganadora. El xuráu d'esta edición tuvo presidíu pol director xeneral de Política Llingüística, Antón García, y integráu pola filóloga Claudia Elena Menéndez y la llibrera especializada en cómic María Fente. Actuó como secretaria Lourdes Álvarez, filóloga de la Dirección Xeneral de Política Llingüística.
Pueden concurrir nesti certamen obres inédites y non premiaes n'otros concursos d'estilu, tratamientu y tema llibre, pudiendo adoptar el desenvolvimientu d'una historia única o un conxuntu d'histories, con una estensión mínima de cincuenta páxines, anque pa participar yera abondo con presentar un proyectu primeru con una estensión mínima de quince páxines.
