Los Fresnos y El Vasco
Les palabres, y ente elles los topónimos, tienen oríxenes pervariaos. Dacuando ye bien fácil saber d'aú vien un topónimu; otres vegaes ye dudoso; y en delles ocasiones ye imposible, colos datos disponibles, desentrellizar cuála puede ser la so procedencia. En bien de casos, les apariencies engañen, y muncho. Ye lo que pasa con dos topónimos urbanos: Los Fresnos, en Xixón; y El Vasco, n'Uviéu.
Nel añu 1992, y darréu de la tresformación urbanística d'una parte d'El Llano, creóse'l centru comercial Los Fresnos. Dióse-y esti nome porque yera como la xente llamaba a esa zona enantes d'urbanizase. Y ye verdá, la zona llamábase asina; doi testimoniu personal d'ello, yá que me crié en Pumarín y Los Fresnos yera un escenariu de xuegos pa los guah.es de Pumarín y El Llano.
Un investigador del futuru, que nun tuviere más documentación qu'esi nome, diría que «Los Fresnos» esplícase fácilmente porque nesa zona había árboles d'una especie y característiques determinaes, esto ye: fresnos. Pero otru investigador del futuru que tuviera información real, diría que Los Fresnos nun tien nada que ver con árboles, causando gran incredulidá y plasmu ente los sos contemporáneos. Pero tendría razón. Llamábemos Los Fresnos a esa zona d'El Llano porque nella taba'l campu fútbol llamáu «Hermanos Fresno». Acuérdome perfectamente de cómo yera esa zona suburbial d'El Llano, onde taba tamién el pobláu de chaboles La Cábila, y onde había praos y praos onde xugar.
El campu «Hermanos Fresno» debía-y el nome a los hermanos Fresno, qu'al paecer yeren los amos d'esos terrenos, onde esplotaben una ganadería enantes de la Guerra Civil. Nos años 40 foi'l campu del equipu llamáu Oriamendi, y nos años 50 mercólu l'Sporting pal so filial el Deportivo Gijón. El nome oficial (toi viendo'l lletreru) yera «Hermanos Fresno», pero toos dicíemos «campu Los Fresnos», y asina llamábemos la zona; d'aende vien el nome del actual centru comercial. ¿Veis cómo les apariencies engañen?
N'Uviéu hai una zona, ente Víctor Chávarri y la cai Xovellanos, que la xente llama El Vasco, onde ta la perfamosa cai Gascona, «el Bulevar de la Sidra». Agora hai un centru comercial, tovía por estrenar, llamáu «Gran Bulevar El Vasco». A la vista d'esti nome, y sin más información, ún podría albidrar que pela zona debió haber un nucleu d'inmigrantes vascos, o quiciabes qu'un marqués vascu yera l'amu d'esos terrenos. Pero non. Tol mundu sabe que se llama El Vasco porque nesa zona taba la estación del Ferrocarril Vasco-Asturiano, nome que remonta a la empresa Sociedad General de Ferrocarriles Vasco-Asturiana, fundada en 1906, qu'esplotaba los trenes que salíen d'Uviéu a les Cuenques Mineres y San Esteban. La «Estación del Vasco», que yera ún de los sitios más populares d'Uviéu, empezó a valtase nel añu 1989. Un gran error, na opinión de munchos, porque yera un testimoniu industrial y artísticu del pasáu ferroviariu d'Uviéu. Pero la Estación del Vasco guárdenla munchos uvieínos nel recuerdu señardosu.
Un sitiu que se llama Los Fresnos, onde nun hebo fresnos; un sitiu que se llama El Vasco, onde nun hebo vascos. Y esto sabémoslo porque asocedió ante los nuestros güeyos. ¿Qué nun será con palabres qu'acolumbramos borrinoses nes fondures del tiempu?
