Trabe, 30 años asoleyando llibros n'asturianu

Metanes l'olímpicu 1992, fai agora trenta años, nacía la primera editora en llingua asturiana con clara vocación comercial: Trabe. Fundada pol escritor Antón García, el sellu inspirábase n'empreses asemeyaes d'otres fasteres del estáu con idioma propiu como la catalana Alcides o la gallega Galaxia, creaes en plena dictadura franquista. El casu de la creación n'asturianu d'entós nun yera la d'un réxime autoritariu que negaba los derechos más elementales, incluíu el de la llibre espresión na llingua materno, pero asemeyábase abondo al ermu cultural y creativu de la llarga nueche de piedra, de la qu'escribió Celso Emilio Ferreiro. Los títulos inaugurales de les collecciones qu'escomenzó a publicar la nueva editorial daben ya delles pistes: en narrativa, les obres qu'estrenaben el catálogu de La Incla Interior fueron una antoloxía del cuentu anterior al surdimientu y de siguío la traducción de 'La muyer manzorga' de Peter Handke, a la que diba xuntase la obra orixinal d'un autor contemporáneu del país: 'Les falcatrúes del demoniu' de Xulio Viejo. En poesía, La Fonte de Fascura espichaba 'Venti poemes' de Pepín de Pría, pero ya nel so tercer númeru arrebalgaba al presente con 'Xeografía del augua' d'Inaciu Llope, al que diben arreyase nes siguientes entregues autores como Esther Prieto, Xandru Fernández o Xuan Bello col so fundamental 'El Llibru Vieyu'.

El fundador diba dexar por motivos personales la editorial nel añu 2007 y facíase cargu d'ella l'editor de la empresa Ámbitu, Inaciu Iglesias. Cinco años después, Esther Prieto y Samuel Castro, hasta entós empleaos del sellu, diben convertise nos nuevos propietarios hasta güei. Dende los sos inicios dica el so afayu actual na cai Fernando Alonso compartiendo espaciu cola so llibrería, les cifres dan seña del so bagaxe: más de 1.050 volúmenes publicaos, d'ellos alrodiu de 900 en llingua asturiana. Ente los autores con obra asoleyada nel sellu, la práctica totalidá de les tres xeneraciones coesistentes de la lliteratura d'anguañu y una bona esbilla de la biblioteca de Babel: del primer tomu de la 'Odisea' vertida por Xosé Gago a 'Harry Potter' o el recién 'El Señor de los Aniellos', pasando por nomes claves de la escritura universal: Balzac, Stevenson, Scott Fitzgerald, T.S. Elliot, Kafka, Puskin, Miguel Torga o Clarice Lispector.

Pa los sos actuales responsables, l'actividá editorial va de la mano afayadiza de la tienda: «La llibrería da visibilidá, vendes directamente colo que revierte más, al llau d'una meyor comunicación colos autores y el mundu cultural asturianu», desplica Prieto quien señala que tamién «funcionamos como puntu d'información a la xente y sitiu d'alcuentru onde entamar cualaquier tipu d'actos lliterarios». Tanto ella como'l so sociu lleven tres el mostrador dende l'apertura del primer espaciu comercial de Trabe y d'entós p'acó dalgo mudara'l perfil de los veceros: «Cuando retomamos la llibrería en 2010 entraba xente y nun conocíamos a naide porque yeren toos mui mozos, hai un públicu renováu de xuro qu'en parte pol potencial que suponen los minor que la Universidá ta ufiertando. Y tan los clientes de siempre, llectores n'asturianu, la mayoría ensin venceyu cola enseñanza o la lliteratura y que converxen na llibrería». La editora apunta que «esti últimu añu vendióse más equí que por distribuidora en toles llibreríes d'Asturies», maticen.