Les Lletres vuelven al Campoamor
L'actu va cellebrase'l 5 de mayu cola entrega del Premiu Nacional de Lliteratura a Lourdes Álvarez y un recital de Silvia Quesada
P. A. M. E.
UVIÉU.
Viernes, 14 de abril 2023, 02:02
El Día de les Lletres Asturianes entamáu pola Academia de la Llingua vuelve al so horariu avezáu d'enantes de la pandemia y al escenariu del Teatru Campoamor pa la cellebración del so actu institucional. Asina lo anunció la corporación que preside Xosé Antón González Riaño esta selmana nun comunicáu nel que tamién se desvelaben otros detalles del programa, como la recuperación de la tradicional espicha posterior a la sesión académica pública nel coliseu uvieín. El Llagar d'Herminio de Cualloto ye'l sitiu escoyíu pa la xinta, abierta a tolos que quieran participar nella comunicándolo por corréu electrónicu (xestion@alladixital.org).
La edición númberu 44 de la fiesta de les nuestres lletres va entamar a les 19 hores y nella va facese entrega el III Premiu Nacional de Lliteratura Asturiana a la poeta Lourdes Álvarez.
Nesta ocasión, acoyeráse al filólogu David Guardado como miembru de númberu de la institución y, tres el discursu oficial del so presidente, va pesllase l'actu con un conciertu de la cantante Silvia Quesada, acompañada de los músicos Alfredo González y Cristina Gestido.
A fecha de güei, inda nun se conoz el conteníu de la intervención de González Riaño, sicasí ye más que probable que, xunto col habitual repasu del añu académicu, tenga palabres de reflexón alrodiu'l frustráu intentu de reforma del Estatutu y la oportunidá perdida pa incluyir nella la cooficialidá del asturianu y del gallegu asturianu.
La Conseyería de Cultura, Pollítica Llingüística y Turismu. pel so llau, va presentar el programa d'actividaes de la Selmana de les Lletres, dedicada esti añu a l'alcordanza del escritor Xosé Bolado.
La edición d'un llibru cola so obra amás d'un volume monográficu sobre la so figura van remembralu xunta un documental dirixíu por Ana Lamela.
