La sidra DOP promociónase n'asturianu

El Conseyu Regulador de la DOP Sidra d'Asturies apuesta na so campaña publicitaria de branu pol usu de la llingua asturiana. Embaxo la llienda: «La sidra, con mazana d'Asturies. Pidi sidra con denominación d'orixe, lo auténtico», dase protagonismu al papelu de los collecheros nel espardimientu de la producción de la bebida autóctona con materia prima del país y llámase a la responsabilidá del consumidor nel productu que demanda. Mupis y marquesines van ser los soportes d'esta promoción –na que tamién s'emplega el castellanu– en Xixón, Uviéu y Villaviciosa, mientres nel restu del Principáu aportará n'autobuses y anuncios en medios de comunicación. Los responsables del Conseyu acepten asina el brinde fechu nesi sen por colectivos asturianistes a cuentu de la última campaña entamada na que la nuestra llingua taba ausente y súmense destamiente al camín iniciáu por otres marques comerciales nel usu publicitariu del asturianu.