Leonor
ISMAEL GONZÁLEZ ARIAS
Martes, 21 de septiembre 2021, 03:08
Esti sábadu que tuvi en Teberga despidiendo a la última hermana de mio madre alcordéime que nel 76, a la salida de misa, había un ... autobús aparcáu debaxo de los teixos de delantre la Colexata y una montonera de paisanos ya paisanas, roxos de pelo ya mui blancos de cara, que se veía a la legua que debían ser de perende alantrones. Diben vistíos mui raro, con roupa de colores, pantalones curtios, calcetos de l.lana ya una botonas tremendas de grandes. Dalgunos l.levaban prismáticos colgaos del cuellu ya outros unos cayaos mui finos, como de metal, que brillaban al sol. Al momentu salió de la iglesia'l cura, Don Rafael, señalóme col deu ya l.lamóme. «Oye, ¿tu no habrás estudiado inglés?», preguntóme.
Diba acompañáu d'ún de los visitantes del autobús, que parecía ser el que más mandaba ente el.los. Yo, acostumbráu como taba a dicir a tou que sí cuando te lo preguntaba una persona mayor ya, más tovía, un cura, dixe que sí, que falaba inglés, anque'l mio inglés yera perroneiru, d'Institutu d'aquel.la época, que ya más o menos como l'inglés que saben los guajes d'agora: 'yes, no, sorry, thank you, I'm Ismael', ya cuatro cousas más. Don Rafael quedóu encantáu: «Mañana vas a hacer de guía para estos señores, los vas a subir por San Lorenzo hasta Cueiro y los vas a bajar desde allí hasta La Riera donde los recogerá de nuevo el autobús. Te van a pagar 500 pesetas». ¡500 pesetas! ¡500 pesetas del 76! El cine infantil en Mieres costaba 3 pesetas, daivos cuenta. Aquel.lo yera un capital.
Al día siguiente l.levanté a las cinco la mañana ya fui hasta La Pedrera de La Plaza, onde taban acampaos. Arrancamos a andar a las seis en puntu. Como nun había prisa, subilos por Vil.launel hasta Vixidel, cruzando'l bosque de Mil. A las siete en puntu, cuando l.legamos al l.lanu d'enmediu de Vixidel, tíu Lolo ya tía Covadonga pensanon qu'aquel.lo yera una invasión. Menos mal que diba yo delantre de la tropa. Ficimos una paradina de nada, pa saludar ya poucu más, ya tiréi con el.los pol camín de la braña, a la vera de la pena Paxarina. Depués de facelos beber na fonte de l'Argaxu abri'l macutu y saqué'l bocadillu chorizu que me ficiera en casa tía Leonor. De l'alcordanza del tastu d'aquel chorizu sigo siendo quién a escribir cousas como ésta, en memoria agora d'aquella hermana de mio madre que tanto nos quixo y tantos bocadillos como aquel nos preparara y nunca apreciamos tanto como agora que nos van faltar pa siempre.
¿Tienes una suscripción? Inicia sesión
