«Esta ye la historia d'un crecimientu personal y colectivu»
Vicente García Oliva. El narrador xixonés tien a piques de publicar 'Los Tordos', una novela realista col marcu de fondo de la guerra civil
Viernes, 21 de abril 2023, 17:12
La selmana qu'entra publícase 'Los Tordos' (Hoja de Lata), la nueva novela de Vicente García Oliva (Xixón, 1944), una historia ambientada n'Asturies rural ente la II República y la guerra civil, cola mano maestra d'un autor clave del Surdimientu.
-Fáleme d'esta novela, na qu'Higinio Carrocera, l'herue del Mazucu, tien un papel destacáu.
-Quería aclariar que nun ye un llibru d'historia, ye una ficción na qu'aprovechando'l marcu que m'ufiertaba la época parezme que-y da más verosimilitú sacar un personaxe real. Nesti casu tenía bastante interés en falar d'Higinio Carrocera, dalguién perimportante na historia d'Asturies y que ye mui desconocíu. La novela percuerre dos histories y una, la más piquiñina, ye la vida de Carrocera na que él fala con El Tordín, ún de los personaxes principales. Ye una conversación ente los dos en Cangues d'Onís, la nueche después de la derrota del Mazucu. La otra historia ye la de la familia de los Tordos desque lleguen a un pueblu a buscar trabayu y cómo se viven ellí tolos acontecimientos d'esi tiempu. Al final conflúin entrambes histories.
Xorrecimientu
-¿Amás del interés por Carrocera, teníalu por dar la so visión de la guerra civil?
-Equí nun tomo partíu, hai un protagonista en primer persona que ye'l Tordín y los acontecimientos refléxense al traviés de la so mirada. Ye un personaxe republicanu y revolucionariu pero non afiliáu a nengún partíu, como hubo munchos. Nel so pueblu son mayoritariamente socialistes y el personaxe de Carrocera respuende a la moral que teníen los anarquistes de la política, pero nun hai narrador que se moye con unos o con otros. Pela mio banda hai una neutralidá buscada.
-Tien escrito abonda lliteratura xuvenil ya infantil, amás de fantasía. ¿Foi un retu esta novela realista?
-Nun ye la primera, escribí la de Rambal ('L'aire les castañes'), otres policiaques. Pa mi nun ye un campu desconocíu porque mesmo tengo coses pa rapazos que son realistes. Lo que sí ye nuevo ye'l garrar una parte de la historia d'Asturies como marcu onde se desendolquen los fechos de la novela. Equí ye un marcu mui concretu qu'abarca una década del 30 al 40 na que pasaron tantes coses n'Asturies. Esos años son de maduración y concienciación pal protagonista, qu'empieza siendo un rapaz y, a midida que se fai mozu, va dir algamando una ideoloxía política y a implicase nos acontecimientos que pasen. Nesi sentíu ye una novela de crecimientu personal y colectivu tamién del propiu pueblu onde se desendolca.
-Como autor de primera hora, ¿cómo ve'l panorama lliterariu anguaño?
-Hai un xorrecimientu numéricu y de calidá. Parezme interesante esta llinia que vuelve a la nueva fantasía. La poesía ye un xéneru que sigue calteniéndose y en narrativa los últimos premios Xovellanos creo que tienen un nivel bastante altu. Dalgunos de los vieyos siguimos escribiendo como González-Quevedo, Sánchez Vicente. Hai esa mecia de los que tovía tamos ehí y de xente mozo qu'escribe mui bien y que t'aportando coses nueves.
-Citaba la fantasía, na que foi pioneru, ¿una vía a ampliar llectores?
-L'apuesta d'editoriales por averase a xente que nun tán por lleer n'asturianu con noveles entreteníes d'esos xéneros ye una manera de facilita-yos les coses. Abrir caminos nuevos siempre ye bono, lo cualo nun quier dicir que tengan ser namás esos.
