Asturianos. Españoles. Europeos.

Los resultaos de la encuesta tamién evidencien lo nada europeos que son en xeneral toos y, de manera particular, los asturianos. A Europa, como sentimientu, quéda-y enforma por andar. ¿Pue falase, asina, de cultura europea, de cultura d’un supuestu pueblu européu?

Un bon llugar pa facese esta pregunta ye l’acabante d’estrenar república de Kosova. Un llugar con idéntiques dimensiones qu’Asturies y como Lleón, con branos más cálidos y iviernos más fríos. De la que Sarajevo yera como Barcelona –una ciudá europea qu’agospiara unos xuegos olímpicos–, Pristina, la so capital, yera la ciudá provinciana anónima y desfarxolada que nos remite a les fotos de la Transición española. Asina, Kosova nun dexa de ser Europa, porque tampoco dexa de traenos a la memoria l’alcordanza de qué ocurriera en Sarajevo va tan poco, como les imáxenes de Dubrovnick bombardeada, la destrucción de la ponte de Mostar, l’horror de Gorazde. Nun nos daba del too la sensación de tar siendo bombardeaos, pero sentimos que les bombes cayeron cerca.

Y, con too, Kosova recuerda más a Asturies, por una razón cenciella: pa tou serbiu nacionalista –y nos tiempos que cuerren son enforma–, nel sagráu territoriu de Kosova tá’l aniciu de la patria Serbia. Un datu hestóricu que se pierde na épica medieval distorsionada pol romanticismu y pol nacionalismu d’última xeneración. Dalgo tan anacrónico como considerar Asturies ‘la cuna’ d’España, por más qu’haya bien de xente que lo crea, al menos como creencia poética. Una creencia non enforma reforzada poles soflames d’un españolismu a la serbia, por más que vengan de xemes en cuando los de Vox per Covadonga. Y haya dalgún Grandón qu’argumente como cierto qu’España ye Asturies y, lo demás, tierra conquistada.

Un datu aparte: los llibros de bachiller portugueses falen d’Asturies como ‘la cuna’ de Portugal. A ver si en dalgún momentu tienen de decidise los asturianos con qué ‘cuna’ quedar.