Los meyores poemes del mundu
LOS VERSOS DE ISABEL GUTIÉRREZ Y BERTO GARCÍA ·
Martes, 30 de marzo 2021, 04:09
L'autora gallega Alicia Louzao algamaba'l pasáu 21 de marzu el Premiu Internacional de Poesía Jovellanos al Meyor Poema del Mundu cola so composición ' ... La tierra de los fracasados'. Un xuráu formáu por Javier Almuzara, Ángeles Carbajal, Xuan Bello, José Luis García Martín, Ignacio Martínez, Cristian David López y Antonio Garrigues Walker decidía por mayoría otorgar el gallardón a esi testu, escoyíu ente un total de 2.669 candidatures presentaes en diecinueve llingues distintes dende 52 países. La otra noticia resaltable foi que, por primer vez na hestoria del premiu, el segundu y el tercer de los poemes más votaos taben escritos en llingua asturiana.
La llanisca Isabel Gutiérrez Novo (Pancar, 1980) consiguía asitiar los versos del so 'Facer güecu' na segunda posición de les votaciones y el corveranu Berto García (Les Vegues, 1975), llograba otro tanto nel llugar inmediatamente posterior ente la treintena de finalistes col so poema 'Velea'. Un fitu pal idioma asturianu, según reconocen entrambos, d'un certame mundial abiertu a la participación en cualaquier llingua y que na so primer edición tuvo como ganador un testu en guaraní del escritor paraguayu afincáu n'Asturies, Cristian David López.
Díes después de desvelase'l fallu, Gutiérrez Novo amosábase «mui contenta y sorprendida, porque soi una persona qu'escribe más bien poco y n'asturianu nun me considero dafechu avezada, uso la llingua que sé, mui averada al amestao», afirmaba dende Pancar, el llugar natal d'esta diplomada en Rellaciones Llaborales que reside en Madrid de cuantayá y a la que la pandemia truxo de vuelta a casa, dende onde teletrabaya. Al pesar de la so confesión, l'autora del segundu meyor poema del mundu, tien más lloreos lliterarios nel so haber como'l Concursu de Cuentos pola Oficialida de Bimenes, que llogró en 2013. El so poema, desplicaba, alude al viaxe perpetu de la vida adulta y el sentir dolorientu del raigañu.
L'otru finalista, García, con siete poemarios publicaos, resaltaba como motivu pa presentase «la oportunidá de poder facelo n'asturianu y con un poema solu, por eso cuando vi que lu escoyeran ente casi 2.700, nun podía nin creyelo». Sicasí, afirma que «a nivel personal sentí lo mesmo que si lu hubiere ganao cualquier otru, lo importante ye que l'asturianu tea visible, al mesmu altor que cualquier idioma del mundu y que la calidá lliteraria ye mui potente. Ye la preba cuando se nos dexa competir n'igualdá». El so poema «fala del mieu que sientes na velea, esi estáu difícil de describir», desplicaba, animáu a volver concursar l'añu que vien: «Voi poneme ya al llabor».
¿Tienes una suscripción? Inicia sesión
