«Tenemos una narrativa tan bona y mala como en otra llingua»

Autor d'una intensa xera como poeta y cuentista, José Luis Rendueles (Xixón, 1969) publica la so primer novela 'La llibertá de los caminos' (Trabe), una amena y cruda trama histórica aliñada de xuegu lliterariu.

-¿Por qué-y avagó tanto publicar una novela?

-Básicamente por falta de tiempu, una novela requier dedicación, hai que tener la cabeza centrada nella y munchu tiempu llibre: yo tengo un guaje, una familia, un trabayu (rises). Tamién ye que soi bastante vagu pa escribir, pero faígolo constantemente, lo que nun me apetez ye publicar. D'escribir tengo ganes siempre, de dalo a estampa cada vez menos, debo ser que me toi volviendo vieyu pelleyu y que veo ciertes coses que se publiquen. Non namás n'asturiano.

-De contar esta historia tenía bastantes ganes.

-Va tiempu tuve intentando facer la biografía de Jesús Ibáñez, el famosu revolucionariu autor de 'Memorias de mi cadáver'. Pasé seis o siete años buscando documentación y cuando me puse a escribila vi que nun terminaba de furrular. Al final acabé escribiendo la historia de la madre d'Ibáñez, una muyer mui interesante. Criada n'Urbiés emigra a Francia, ellí refina muncho, quier ser monxa pero queda n'estáu, depués va andar de titiritera nun carru con unos xitanos. Yera mui culta y mui anarquista, acabó en Xixón lloca pidiendo na cai.

-Esa ye una de les dos trames qu'amañen la novela.

-En realidá ye una novela y amás la novela de la persona que la escribió. El casu fue que me punxe cola historia de la Doña d'Urbiés y como tampoco nun m'acababa de convencer dexéla nun caxón. Apocayá ocurrióseme escribir otra novela que l'arropara y creo que l'amestu quedó bien. Parezme que val pa desplicar delles coses de la nuestra historia nes últimes décades.

-El relatu metalliterariu da-y pie pa que'l personaxe narrador se despache a gustu con tol parnasu asturianu...

-Esi personaxe en realidá ye un mediocre que-y da por escribir y como él cree que ta enriba la media los demás espotrica tolo que quier. Poner un personaxe asina permítete soltar munches tochures, con unes tas d'alcuerdu, otres nun son más que pa tocar un poco les narices. La lliteratura ye xuegu, por eso nun hai que tomala siempre en serio del too.

-¿Y l'asturiana de güei cómo la ve?

-Véola más sana que nunca. Hubo años que había bona poesía y nada de narrativa. Agora ya tenemos una narrativa tan bona y tan mala como en cualquier otra llingua, incluso diría meyor porque edítase poco y la verdá tán publicándose coses mui bones. Otres non tanto, pero bienveníos sean toos y ya el tiempu dirá. Como llector les novedaes espéroles de los mozos, el futuru ye d'ellos y tienen vagar pa ser lo que quieran ser. Si perseveren toi convencíu que dalgún d'ellos puede llegar a lo más grande.