Suaños rotos

Sicasí, tanta gayola nun podía durar y col tiempu acabamos por confianos, escaeciendo que tanto en Llondres como n'Asturies les muries tienen güeyos, oyíos y boca, y xuxurrien seliquinamente los secretos de la xente. Alicia y yo nun mos decatamos hasta'l caberu momentu, pero pali pali toos na nuesa redolada foron enterándose de lo que verdaderamente había ente nosotres.

Too asocedió, irónicamente, nel día del nuesu aniversariu. Teníemos munches coses planeaes pa celebrar la xornada y teníemos munchos suaños por cumplir, pero esi venti de setiembre finó con toos ellos y devolviónos a la escura y dolorosa realidá.

Esi día, como tolos demás, salimos ceo pela mañana, cuando entá yera de nueche, pa dir hasta la redaición, pero malpenes pudimos andar unos metros cuando cinco solombres apaecieron d'un portal cercanu y nos asaltaron de sópitu, metiéndonos pa una de les munches caizueles ensin salida que salpiquen el paisax de ciudaes grandes como aquella. Lo primero que ficieron foi tapanos la boca pa que nun pudiéremos glayar y, darréu, el que paecía ser el so llíder arrincó-y el vestíu coloráu que yo-y regalare a Alicia pol so cumpleaños y la violó delantre de los mios güeyos, riendo.

Intenté debatime, pero teníen por min dos homes muncho mayores que yo y nun podía iguala-yos, nin siquiera coles nueves fuercies que me percorríen pola mor de la rabia y la impotencia que sentía. Quería llibertame, quería protexela y alloñala de cualesquier dañu, pero nun podía, los brazos que me sosteníen torgabenme de facelo. Namái fui a consiguir que l'apiertu que silenciaba la mio voz afloxare durante unos breves segundos, nos qu'aproveché pa morde-y la mano al mio captor y, al veme llibre pa glayar, entamé a pegar berríos cola voz quebrao, pidiendo socorru y ausiliu. Nun tardaron en cruciame la cara y en tornar a enmudeceme, pero les mios voces dexaron-yos esmolecíos y acabaron por decidise a marchar. Yo yá pensaba que lo peor pasare cuando vi como'l qu'acaba de forciar a la mio amante la aventaba escontra un contenedor. Ensin poder facer nada, pues aína taben garrándome, columbré como la so siesta cruciaba l'aire y golpeaba'l borde del mesmu, provocando qu'ella perdiera la conciencia nel intre.

L'ambulancia tardó n'aportar y más tardamos en llegar al hospital. Yo nun podía llevantar los güeyos del so cuerpu inerte. Tampoco nun podía falar nin entendía lo que me dicíen. Sentía les voces del restu la xente mui alloñaes, como si tuvieren falando al traviés d'un cristal o d'una puerta. Sabía que taben faciendome entrugues pero nun les comprendía. Toos me facíen entrugues, los prauticantes, les enfermeres, toos, pero yo nun-yos comprendía. Namái oyía la pallabra «non» resonando continuamente dientro la mio mente y, de sópitu, esa pallabra aparó. Quedé en blancu y pudi oyir y entender perfechamente una fría y cenciella fras n'inglés qu'un doctor de rostru circunspeutu pronunció delantre de min tres comprobar quién yera.

-Vusté debe ser Aurora Amor ¿Nun ye asina? Siento tener qu'informa-y de que la so compañera finó va unos momentos a causa del golpe que recibió nel so cráneu.

Siguió parllando, pero yo yá nun-y presté atención. Dalgo camudó na mio mente y lo que tenía que facer quedó mui nidio pa min. Llevantéme del asientu y caminé serenamente colos güeyos resecos hasta la ventana.

Andrés Fernández Menéndez ye un mozu escritor nacíu nel añu 2003 que reside nel morciniegu pueblu d'Argame. Fizo la escuela primaria y secundaria nel Colexu Marista Auseva y nel IES Aramo. Ellí entamó a dar los sos primeros pasos na so carrera lliteraria, asoleyando'l so primer relatu, tituláu 'Plomu y Sangre', nesti mesmu periódicu, en mayu del añu pasáu.