Númberu nuevu de la revista 'Ciencies'

L'Academia de la Llingua Asturiana acaba d'asoleyar el númberu 13 de la revista 'Ciencies' que dirixe Carlos Lastra y que nesta nueva entrega vuelve ufiertar una gran diversidá temática nos sos conteníos. Nellos el biólogu Fabián Rodríguez López firma l'estudiu: 'Xuba na temperatura l'agua y cambeos na zonación de les algues nun pedreru del occidente asturianu (Campiel.los, Valdés)'; el caderalgu de Botánica, Tomás Emilio Díaz remembra los 'Venti años del Xardín Botánicu Atlánticu de Xixón'; la doctora en Bioloxía, Irene Fernández Rodríguez, aborda los 'Efeutos de l'autonomía y la rexeneración en llacértidos'; mentantu el neurofisiólogu Xesús González Rato publica l'estudiu: 'El sindróme d'apnea del sueñu n'edá infantil'; l'investigador del CSIC Daniel Fernánez González escribe alrodiu del 'Usu de la enerxía solar nel ámbitu de la metalurxa y la ciencia de los materiales'; y los profesores Ismael Marcet, Manuel Rendueles y Celso Díaz pesllen la publicación col trabayu 'De la que tábemos faciendo un quesu'.