Europa tien que s'armar

Lo de llorar dásenos bien. Igual que lo de regular y teorizar. Llevamos ya tiempu falando d'autonomía estratéxica, de soberanía alimentario, d'un armamentu propiu o de xigantes empresariales que puean enfrentase a les tecnolóxiques americanes. ¿Pero úlo too ello? La realidá ye qu'en cuantes una empresa europea –mesmo les pymes– gana tamañu aparez el tribunal de la competencia y acabose. Y tanta regulación ta saliéndonos caro; nun espabilamos: los alemanes nun quieren teleoperadores franceses; a los italianos nun-yos gusta operar con bancos escoceses; y los polacos nun ven películes portugueses. No único que nos apautanos tolos europeos ye n'usar el GPS, l'Amazon o el Microsoft americanos.

Y, como negociu, mal. De toles perres qu'echamos na guerra d'Ucrania, la mayoría fueron pa les industries de Canadá y Turquía. Europa tien 16 modelos de tanques, Estaos Uníos namás ún. Europa, 24 clases de fragates; Estaos Uníos namás ún. Europa, ocho tipos d'artillería; Estaos Uníos namás dos. Europa –contando'l Reinu Uníu y Noruega– tien donao ayuda militar a Ucrania por 62.000 millones d'euros; Estaos Uníos, 64.000. Pero si añadimos l'ayuda financiera y humanitaria, la d'Europa algama los 132.000 millones d'euros y la d'Estaos Uníos nun llega a los 114.000.

Pagamos la factura y nun pintamos. Y eso tenemos que lo camudar, nun llorar tanto y tirar p'alantre. Necesitamos un exércitu propiu. Igual que necesitábemos una moneda, un parlamentu y una Unión. Dalgunes d'eses coses tenémosles y agora toca enfotase y construir, con esfuerzu, les nuestres telecomunicaciones, aceríes, enerxétiques y ganaderíes.

Nun va ser fácil y nun podemos dicir que nun nos avisaron. El tiempu de llorar o facer esparavanes ya pasó, porque l'enemigu daveres nun ye América, Rusia o China per se. Son los populismos autocráticos y nosotros, los buenos, tenemos que nos defender.