Uviéu 2031

Vuelvo del sur. Nesta ocasión de El Puerto de Santa María. Per tolos llaos aparez información del proyectu de candidatura de Jerez de la Frontera a Capital Europea de la Cultura 2031. Va dos años yá se falaba d'ello. Mírolo na prensa y veo que se presenten 34 ciudaes de 19 países. Siete d'elles, españoles. Xunto a Jerez de la Frontera, les ciudades de Granada, Burgos, Cáceres, Toledo, Las Palmas y Uviéu. Sabía de la de Granada. Conocía la de Burgos. Y enteréme de la de Cáceres porque esti xueves pasáu dormimos ellí. D'Uviéu, con evidente retrasu, entérome al llegar. Pola noticia d'una reunión esti día atrás con axentes culturales y demás. El gobiernu municipal diz que «será una candidatura fallida si nun consiguimos la implicación activa y permanente de tola ciudadanía». Dalgo que suena a disculpa. Suena a dicir: nun lo vamos consiguir, pero la culpa va ser vuestra.

L'obxetivu xeneral de la Capitalidá ye protexer y promover la diversidá de cultures n'Europa. Nel casu de San Sebastián 2016 fue dalgo evidente. Dende'l primer momentu. Presentóse como Donostia/San Sebastián 2016. Como Santiago 2000, que defendió la so identidá gallega al par de la española y europea. Lo primero que veo equí ye que la candidatura d'Uviéu aparez en toes partes como Oviedo. Incumpliendo por ello'l primer obxetivu de protección y promoción de la diversidá. Lo segundo que veo ye'l nomamientu de Pepe Mompeán pa dirixir el proyectu. Un bon profesional y de reconocíu prestixu nel ámbitu de la música clásica. Pero, la pregunta ye la de siempre: ¿por qué se desprecia a los propios profesionales asturianos? Si Pepe fue bonu como asesor de la Comunidá de Madrid, contrata-ylu como asesor d'ésta. Xunto a bien d'otros grandes profesionales españoles con experiencia notres candidatures. Pero, por favor, si nun cuentes como cabeza visible con un profesional d'equí, la sensación que tás dando ye pésima.Recordemos, namás por recordar, que la primer propuesta de candidatura d'Uviéu sonó pol 2023. Y rechazóla esti mesmu equipu de gobiernu. Tamién sonó la propuesta de Xixón, pero abandonóse por «inversión inasumible», según les sos propies palabres. L'exemplu de candidatura más averada a lo que ye Uviéu podría ser la d'Essen. Fíxolo en representación de les 53 ciudaes de la comarca del Ruhr. Eso si fue conseguir apoyos. Nun escaecer la so propia hestoria industrial y minera. Nun perder de vista la so popia vida. Nun plantear una candidatura basada namás nel propiu grandonismu de la nuestra tradición babaya que nun va xenerar más que gastu y cansanciu. Y ye una pena perder asina'l tiempu.