Mieres
ISMAEL MARÍA GONZÁLEZ ARIAS
Martes, 1 de junio 2021, 04:50
Cuido siempre que la novela que más me recuerda Mieres ye 'Clochemerle', del escritor francés Gabriel Chevalier, que la escribiera en 1934 y de la ... que publicó en 1951 la segunda parte, 'Clochemerle-Babylone', y la tercera en 1966, 'L'envers de Clochemerle', que tuvieron tanta sonadía que d'elles se ficieron películes, obres de teatru y una serie de televisión que s'emitió n'España a finales de los 70, producida pola BBC y rodada en Colombier-le-Vieux. Recomendable la visita, pero inda más recomendable la llectura del llibru o simplemente la visita a Mieres cualquier día de semana pa ver eses terraces tan magníficamente descrites en Clochemerle, atacaes de paisanos que saben la vida y milagros de tol vecindariu y dan opinión gratuita y maledicente de tol que pase per delante y que, nel casu de Mieres, más acordies colos tiempos, tan también atacaes de paisanes, igual de bilorderes, igual de gratuites nes sos opiniones, igual también -o peor- de maledicentes.
Si cola hestoria de la cayida en desgracia del SOMA y la creación de la casta de los prexuliaos mineros que, escontra de lo que cuidaron bien d'ellos, acabaron con Mieres y les Cuenques en xeneral, fui quién a escribir una novela d'humor amargu, nun vos digo les notes que vengo tomando d'esti Mieres d'agora mesmo terraceru, cacipleru, más dáu al cuentu qu'al café y más que nada a la bulisma, a echar la llingua a pacer pa nun s'envenenar de mordésela, a dar la parpayuela, a ser carne de falcatrúa y a ser quién a montar un argadiellu d'una nada -o, lo que ye lo mesmo, a falar de más cuanto más se tien de callar-.
Pa volver sentir esta presencia de güeyos estelaos y llingua bilordera regresé a esti Mieres del Camín a Nenyures depués d'un añu llargu ente Cádiz, Lluanco, Villaviciosa y Uviéu con ganes d'escribir más bien una obra de teatru de les llamaes costumbrista, porque costumbrista. Ye lo qu'hai -como se diz equí-, un sitiu como tantos otros que nun valen pa nada y que lo son too, onde'l Diablo cojuelo convive cola madre del Buscón y n'onde namás unos güeyos guapos y valientes sálvente les ganes de siguir, con un Beaujolais na mano, que ye también lo mesmo que salva a Clochemerle.
¿Tienes una suscripción? Inicia sesión
