Lourdes Álvarez
L'autora d'Urbiés peñera no esencial y na inocencia de lo vivío nel so últimu llibru 'Lo verdadero', una obra de plena y consciente madurez
Lourdes Álvarez (Urbiés, 1961) vuelve a la pureza de la emoción na memoria nel so recién llibru 'Lo verdadero'. La propia poeta fálanos d'ello.
–D'esti llibru dizse qu'hai nél un exerciciu de culturalismu y poesía de tresmisión oral.
–Bono, de culturalismu igual nun hai tanto. Hai referencies culturales, pero non nel sentíu que se punxo esa etiqueta a los Novísimos. Y referencies sobre too poétiques. En cuantes a la cuestión popular, pienso que siempre hubo un posu d'ello na mio poesía o del son de la poesía popular. Ya en 'Aldabes d'olvidu' había un poco de cantares, dalgunos metros octosílabos y agora nun ye tanto la métrica pero sí hai esi xuegu tamién, posiblemente seya de canciones populares infantiles, anque nun seyan esactes, porque son inventaes, pero tienen el fundamentu de cantares infantiles que conociste.
–¿Cómo lu definiría usté?
–Ye mui difícil. Xeneralmente sé por qué empecé a escribilo y alcuérdome por qué punxe'l títulu y de munches otres coses, pero después nel procesu hai notes del inconscientes que nun sabes por qué afloren. Pero sí tuviera que dicilo, pienso que parte de lo inicial, lo intacto, la inocencia, de lo non contaminao, lo esencial, que sería la infancia ¿non?. Una infancia na que ya conoces la presencia de la muerte, y vuelves otra vez a xenerar esa proyeicción cola mesma certeza de la propia muerte tuya. La nieve qu'hai na portada, encierra una captura de la simboloxía del llibru.
–Ye dalgo tamién mui presente na to obra, esa dicotomía memoria-olvidu.
–Sí, equí, esi binomiu podía ser vida-muerte. Yo pienso que podría ser eso. Abórdase la muerte y al mesmu tiempu esa capacidad tamién de renacer otra vez y volvera lo inicial y a lo intacto. Yo creo que ye como una especie de rueda hasta que se cierra'l llibru.
–¿Y lo verdadero del títulu, nesi sentíu, sería el vivir?
–Lo verdadero ye más bien la inocencia a la que vuelves siempre al pesar de lo vivío o esi intentu de volver a ello.
–L'esmeru y claridá de la so escritura, suxer un ritmu posáu y consciente del sentir de cada poema. ¿Ye asina?
–Parezme que la mio poesía ye más suxerente que esplícita. Hai muncho precuru y los mios procesos d'escritura son llargos pero son tamién constantes anque después eso nun se reflexe no que publique o na cantidá de los poemes de cada llibru, pero sí lleven una ellaboración ya dende que se rumien nel inconsciente y requieren por esi motivu desos procesos más bien llargos. Son los qu'aveza la mio poesía.
–Al llau d'otros nomes de la so xeneración ¿siéntese acompañada nes mesmes afinidaes?
–A ver, siéntome acompañada nel sentíu de que son poetes que sigo, interésenme les sos obres y tienen presupuestos estéticos que comparto. Y después hai otra cuestión, qu'hai una referencia, un encuadre sociocultural, históricu, que nos ye común, vivimos un poco lo mesmo.
––¿Y cómo ve la poesía que fai la xente más mozo n'asturianu?
–Sígolo con bastante interés porque tengo enfotu en que se caltenta la lliteratura na nuestra llingua y tan surdiendo voces interesantes de xente mui mozo. El premiu Asturies Xoven ta descubriendo a xente con coses mui interesantes y hai autores que tien alrodiu 30 años y qu'escriben como los ánxeles, mui bien y que tienen un armazón de cultura y llectures que da gustu. Puede haber esceiciones, pero en xeneral veo que nel oficiu hai xente que lo ta fciendo mui bien yeso dame muncha allegría, la verdá.
