«Quixi enllenar un güecu pa nenos de 10 a 14 años»

Sergio Buelga (Xixón, 1979) estrénase na lliteratura infantil y xuvenil cola novela 'Equipu Texu. L'estandoriu máxicu' (Radagast), una narración d'aventures al más puru estilu de les mítiques series de Los Cinco o Los Siete Secretos d'Enid Byton que dexa na so trama un protagonismu especial a los seres de la mitoloxía asturiana.

Director y autor teatral de la Compañia Asturiana de Comedies, y monitor de tiempu llibre, Buelga desplica que foi desenvolviendo esa xera llaboral onde nació'l xermen de la novela que ta acabante publicar. «La verdá ye que salió casi sin pensalo. Yo escribo cuentos curtios, pero como base pa guiones de teatru. Esta historia surdió del mio trabayu nun campamentu pa neños que veníen de toa España y pa que conociesen dalgo de la cultura asturiana, fixe unos xuegos de rol sobre mitoloxía. Ehí ta la base de lo que ye l'Equipu Texu, una especie de cazadores de seres mitolóxicos, Después fui moldeándola con referentes como Los Cinco y asemeyaos; Los Hollister, Goonies o Strange Things». Nesi sen, l'escritor caltién que «en principiu nun yera la mio idea facer una novela infantil, salió d'estos xuegos y después vi que podía garrar un huecu que nun esiste na lliteratura asturiana, el d'histories pa rapacinos y rapacines d'ente 1' y 14 años, más o menos la edá que tienen los protagonistes d'esta novela».

Alejo, Martina, Carmen, Xuan, Enol y Nora son los nomes d'estos neños investigadores del Equipu Texu. «Ca ún d'ellos tien les sos característiques, los sos mieos, les sos inquetúes. Como grupu resuelven les coses porque son amigos y ye l'amistá la tira d'ello», desplica'l so creador. L'enfotu collaborativu y la xuntura polo común marquen el calter d'estos personaxes ensin afogalos, porque como apunta Buelga: «Na narrativa infantil y xuvenil que se fai agora esi tipu de principios-valores de la vida o pasa un poco desapercibido o ye tan sumamente importante que pasa a un segundu planu la propia aventura y equí l'aventura ye lo principal».

En cuantes al conteníu específicu de la trama na que se ven envueltos, Buelga desvela que «Los protagonistes tan viviendo dalgo que ye misterioso, pasen coses y alcuentren seres mitolóxicos, que nun primer momentu nun creen nellos porque ya tienen una edá como pa nun creyer, otra ye qu'esisten realmente y esos seres cuénten-yos que tienen problemes, problemes gordos y ellos intenten resolvelos, hasta tener un enfrentamientu col Nuberu, que ye ya una cosa peligrosa. Tenta siguir l'esquema d'esta triba de narraciones con una llucha ente les fuerces del bien contra les del mal». Arriendes d'ello, señala que «L'estandoriu máxicu del títulu van creándolu coles pieces que los seres mitolóxicos qu'atopen-yos van apurriéndo pa después poder lluchar contra'l mal. Ye como un videoxuegu, nel que van superando pantalles y medrando en sabeduría y al final consiguen el so oxetivu, anque'l final de la historia queda abiertu».

Esi final dexando franca la puerta a una posible continuidá de les aventures del Equipu Textu, sicasí, nun significa, aclaria l'escritor «que piense nuna segunda parte o una serie, inda tampoco lo descarto, pero de mano nun tenía esa intención. De momento préstame tar a la espectativa de lo que-yos pueda parecer esta novela a los rapazos, qu'hasta agora lo que me llega ye una impresión bastante positiva».

Coles sos más de 300 páxines, ta claro que ye un llibru que cunde al que lu llea y les illustraciones de Patricia Fernández Corral complemente la narración y fáenla tovía más gustosa de siguir.

• Temas
• Alitar Asturies