«En xeneral pásolo bien escribiendo, préstame»

–Pol ritmu que lleva de publicar ¿sería desaxerao consideralu un autor prolíficu?

–Home, nun sé, pocoñín a poco voi acabar considerándome, porque en realidá ya voi teniendo bastante publicao ente lliteratura infantil y p’adultos. Enantes non, pero nos últimos años tengo una dinámica que soi bastante regular escribiendo. Si me pongo con una novela, el tiempu que toi con ella dedíco-y unes cuantes hores al día, y n’acabando puedo tar temporaes sin facer nada, pero toi viendo qu’ensiguida viénenme idees y póngome con ello ya. La verdá ye qu’escribo prácticamente a diariu, sinón creación, sí pa correxir o refacer coses. Pero tanto como prolíficu...

–¿Esta novela ye apta pa la xente que tien fobia a los insectos? Dígolo pol títulu y la so cita del Levíticu: ‘Cualquier insectu qu’esnale y ande con pates habéis consideralu tarrecible’.

–Desque traduxeron la Biblia al asturianu la verdá ye que presta alcontrar esi tipu de cites. En realidá el títulu de ‘Dípteros’, les mosques ye daqué paralelo que ta a lo llargo de tola narracción, pero nun ye lo principal del argumentu, anque como hai crímenes, estorsionamientos, carne, sangre, ellos anden siempre alredor y formen parte de la novela. ¿Apta? Si te suxestiona tanto el mundu de los insectos como pa sentir perceguera en lleendo entós nun lo será. Eso ya depende de caún.

–Rescata al teniente Corripio de ‘Pielgos de llercia’.

–Ye’l mesmu Corripio, el llugar tamién, Trubiana, y dellos personaxes que taben nesa novela. Igual acabo faciendo una serie col tiempu si me salen ocurrencies nueves. Aprovechelu otra vez, de fechu ye’l protagonista básicu, tolo que se desarrolla ta dende’l puntu de vista d’él. Ye un guardia civil veteranu, a piques de retirase, pero tien eses característiques del paisanu asturianu clásicu, de la cuenca.

–Equí tóca-y un casu peliagudu, l’asesinatu múltiple d’una familia d’entomólogos alemanes. ¿Cómo ye eso, qué más se puede contar?

–En realidá l’entomólogu ye’l padre d’esa familia y sucede nel tiempu de la pandemia. Ellos vinieron a Asturies dende Alemania a pasar una temporada, el paisanu a estudiar una serie d’asuntos entomolóxicos y instálense cola caravana nos alredores de Trubiana, y ellí en ciertu momentu nesa primavera del 2020 aparecen toos muertos. A partir d’ehí va desarrollándose too.

–Como ye propio nes sos noveles, ta llarada d’humor. Da la sensación de que pásalo bien escribiendo.

–Sí, hom, préstame, anque la escritura tien tamién momentos nos que pilanques o hai una torga que t’impide siguir. En xeneral pásolo bien y eses hores que toi escribiendo son de les meyores, préstame dir afilvanando la historia.

–Y el so asturianu ye mui d’oreya. ¿Adréi?

–Ye una cosa que me diz la xente. Salme asina, después cuando entamo les rellectures inclusive quito coses o cámbioles o fáigoles menos de fala pa que seyan más normatives. Los que tenemos la llingua de nacencia porque se falaba más asturiano al nuestru alredor ye una ventaya que tenemos a la hora d’escribir enriba d’autores más mozos que tiene d’esbrexar más pa usar l’idioma con naturalidá. Después pueden ser escritores bonísimos, pero neso los vieyos sacámos-yos un puntu (rises).