Caxellu, un xuegu pa enredar deprendiendo la llingua

P. A. M. E. La plataforma de conteníu online n'asturianu PlayPresta ta acabante de llanzar na so web y nes redes sociales el xuegu nuevu, Caxellu, desenvueltu de propia mano y que yá puede usar quien-y pete disfrutando de toles sos posibilidaes. La propuesta ufierta un entretenimientu nel qu'hai que combinar siete lletres pa formar pallabres y ye una adaptación del popularizáu trebeyu del New York Times, Spelling Bee.

La iniciativa, que llega agora a Asturies por cuenta de Cuatro Gotes Producciones, ye un ésitu n'otros llugares del estáu, como Cataluña, onde'l lleva'l nome de Paraulògic y rexistró cifres que fixeron que los servidores colapsaran en dalgunos momentos. Los datos de participación siguen medrando, y ye qu'en dalgunos díes de les fiestes de Nadal, el xuegu llegó a cifres d'ente 120.000 y 137.000 persones, lo que dexa bien claro l'ésitu que tuvo.

La creación del xuegu na so versión n'asturianu foi trabayu d'un equipu dirixíu por Inaciu Galán, cola xestión dixital a cargu del informáticu Óscar David Colorado Espina y col diseñu gráficu, basáu na idea del xuegu como un caxellu d'abeyes y de l'abeya Olaya como símbolu, pol reputáu ilustrador Enrique Carballeira. Amás, cuntaron cola collaboración de los creadores de la versión catalana del mesmu. L'Academia de la Llingua Asturiana collaboró tamién apurriendo'l corpus del diccionariu normativu de la institución.

El xuegu ta disponible de baldre nel enllaz: https://caxellu.playpresta.com/ y adáptase perbién al usu dende'l móvil.

Pa Inaciu Galán, coordinador de Caxellu, «esta ye una oportunidá d'ufrir un xuegu interesante y formativu a la sociedá, que pensamos que va ser mui bien recibíu ente toles edaes, especialmente na mocedá, amás de ser una ferramienta interesante pal usu nos centros educativos».