«Les Noticies recibió munches crítiques porque importaba»

Fai agora 25 años presentábase na Feria de Muestres d'Asturies el númberu 0 del semanariu 'Les Noticies', el primer mediu d'información íntegramente en llingua asturiana y que diba publicase -impresu de mano na rotativa de EL COMERCIO- hasta febreru de 2012. Cuntaba ente los sos antecedentes hestóricos cola cabecera de 'Ixuxú', fundáu en 1901 por Francisco González Prieto y ya na dómina contemporánea cola sección Conceyu Bable de 'Asturies Selmanal' o estes mesmes páxines d'Alitar, asoleyaes dende 1978. Amás de la so vocación xeneralista, el nuevu proyectu resaltaba pol so calter profesional y pol so enfotu cola normalización social del idioma. El so fundador y editor, Inaciu Iglesias, va conmemorar el cuartu de sieglu d'esta data donando güei una collección del periódicu a la Conseyería de Cultura del Principáu y tien otra acutada pa l'Academia de la Llingua.

L'empresariu remembra bien aquella tarde d'agostu de 1996 nel auditoriu del recintu Luis Adaro: «Alcuérdome de tar con munchos nervios y muncha ilusión. Queríemos tresmitir qu'esto diba en serio y diba ser n'asturianu pa tol mundu. L'oxetivu, que la xente lo comprara porque s'enfotaba no que diba lleer nél. Eso cumplímoslo hasta l'últimu día», caltién. Iglesias recalca los principios colos que nacía 'Les Noticies': «El primeru, ser una empresa solvente y les 770 selmanes que tuvimos saliendo pagamos a tolos proveedores, a tolos trabayadores, nunca nos aprovechamos d'un euru de dineru públicu nin dexamos un pufu. Los otros compromisos yeren cola verdá, el rigor informativu y col idioma, usar un asturianu correctu y entendible. Nesto último yéramos nuevos porque nenguna facultá de periodismu enseñaba a redactar na nuestra llingua», asegura.

El fundador d'Ámbitu Editorial cuida que la contribución nel espardimientu del estándar asturianu foi crucial: «El trabayu fundamental ya taba fechu pola Academia y otres instituciones, a nosotros tocónos asentalo y enseñalo. Teníamos la suerte de que por obligación pasábamos ocho hores al día escribiendo n'asturianu y eso quince años siguíos tien de llograr daqué. Produxo un idioma afayadizu, cómodu». El principal recursu col que -defende- cuntaben pa desenvolver esi propósitu, yera l'humanu: «Teníamos xente con talentu de sobra y el fechu ye que los profesionales que se formaron en 'Les Noticies' tán trabayando agora n'otros sitios y apurriendo muncho de lo que deprendieron ellí». Na llarga llista de redactores que pasaron peles distintes etapes del periódicu tán nomes como los de Xuan Bello, José Luis Piquero, Ramón Lluis Bande, Miguel Barrero, Vanessa Gutiérrez, Beatriz R. Viado, Damián Barreiro o Henrique Facuriella, ente otros. La nómina de collaboradores y columnistes ye inda más estensa: «Teníamos claro qu'ehí había escribir tol mundu y tol que quixo tuvo el so espaciu, lo mesmo no político: dende Gaspar Llamazares y la estrema izquierda a Cristina Coto, porque lo que nos definía más que la ideoloxía yera'l marcu de referencia qu'asitiaba'l propiu idioma y una vez aceptáu podíes espresar lo que quixeres», diz el empresariu.

Nos sos quince años d'esistencia non too fueron flores les que pañó'l periódicu y asina lo reconoz el so editor: «Tocónos recibir munches crítiques pero yo siempre entendí que yeren bienintencionaes, la xente criticábalo porque-yos importaba y lo sentíen como dalgo propio». Nesi sen, opina que dende'l principiu «la pregunta que taba nel aire yera: '¿Y a vosotros quién vos dio permisu? Y yera asina, naide nos lo dio. Ficímoslo porque nos atrevimos, si nun damos esi pasu, l'alternativa yera nada. Y ficímoslo bien, nunca fuimos contra nadie nin impunximos cosa», declara.

La crisis del 2008 dexó tocáu el proyectu que nun diba ser quien a remontala, sicasí el balance que fai el so fundador ye positivu: «Llegamos a superar los 5000 exemplares, nun par d'años facturamos más d'un millón d'euros y de seis persones en plantiella llegamos a ser 17. Cuando me dicen qu'eso taba inflao y nun podía ser, los datos desmiéntenlo. Tuvimos ehí y ficimos lo que naide nun esperaba», remata Iglesias.