«Como autor mozu siéntome bien acompañáu, hai futuru»

Col so debú lliterariu, la novela '1809' (Radagast), l'escritor morciniegu Andrés Fernández convertíase a los sos dieciocho años nel autor más mozu de la lliteratura asturiana. Pocos meses después d'asoleyala, vuelve sorprender al panorama de les nuestres lletres algamando'l Premiu Enriqueta González Rubín con una nueva obra, de títulu asemeyáu y continuadora nel filu ucrónicu de la primera: '1929'. Nel so acta, el xuráu d'esti premiu empobináu a narradores nuevos, resalta cómo «xuega l'autor cola voz narrativa y el planu temporal» y desplica que ta escrita «dende un enfoque interseccional y usa con aciertu les ferramientes narratives, manexando con oficiu les distintes perspectives temporales y definiendo bien a los distintos personaxes».

Dende Uviéu, la ciudá onde cursa Filoloxía, Fernández desvela que escomenzó a escribir el so relatu «alrodiu de mayu d'esti añu mientres taba con otra novela de fantasía épica más densa que dexara de llau por falta de tiempu y pensé en facer dalgo más cenciello, continuando '1809'. Acabé casi xusto pa presentala l'últimu día de la convocatoria». Respective a l'anterior afirma que «después d'una trama epistolar apetecíame facer dalgo más natural, narrando en primera y tercera persona, calculando tamién una anternancia ente narradores pa xugar con ello. Tien más acción, emoción, tiros y un romance que na otra nun había. Lo demás, el tema de la política y la historia sigue ehí aunque agora ye menos importante esi entramáu. Creo que ye más fácil de lleer», apunta.

En cuantes al relatu que desenvuelve, l'escritor espresa que plantea «una Asturies colonial mui asemeyada a Irlanda na que hai un grupu republicanu que ta lluchando escontra'l poder inglés y la historia sigue la vida d'un cabezaleru d'esi movimientu. Céntrase na entrevista que-y fai una periodista sobre unos fechos que ocurrieron en 1929, d'ehí el títulu. L'alcuentru ente ellos sucede en 1934 y inda que seya facer un poco d'espoiler, sí apaez de dalgunamiente la revolución d'Ochobre, como otros fechos reales de la historia d'Asturies nel primer terciu del sieglu XX. L'añu central ye'l 29 pero hai saltos atrás y alantre nel tiempu», revela. Lo mesmo que na so ópera prima, tamién equí aparecen personaxes reales: «Unos conocíos, otros menos y dellos que se dexa la dulda de sí lo son o non». Un enredu que s'axusta afayadizu al conceptu d'ucronía, que como remembra Fernández «xunta coses ciertes que tola xente conoz con otres que choquen un poco o conceptos que paecen de mano opuestos».

L'autor de '1929' ye consciente de la reponsabilidá d'ufiertar una segunda obra, tres les espectatives abiertes cola publicación d'un estrenu, sicasí afita: «Escribo porque me presta y fáigolo lo meyor que puedo y espero que al públicu tamién-y preste. De los errores apréndese y yo toi entamando, tovía nun cumplí los 19 años». En cualaquier casu asegura que «nun la entamé pensando en presentala al premiu, foi después de tenela fecha cuando lo decidí y por supuesto que ye gratificante'l que te dean el Enriqueta González Rubín porque nuna novela inviertes munches hores de trabayu, pero esi nun ye'l motivu principal que m'afala a escribir».

Fernández confiesa que «siéntome bien acompañáu como escritor mozu, hai xente de la mio edá faciendo coses interesantes y personalmente nel ambiente que me muevo atopo autores colos que coincido bastante no que ye la escritura. El movimientu o los movimientos lliterarios tan mui vivos y creo que hai futuru, inda queden tovía munches coses pendientes», opina.