Collecha nueva pa un mercáu camín de la normalidá

Como saben ustedes la lliteratura asturiana ye un frutu que se da tol añu, pero la collecha principal, la más curiosa y con más salida al mercáu, coincide nel tiempu coles fabes de mayu, alrodiu la gran fiesta cívica del Día y la Selmana de les Lletres. Les novedaes que conquisten el so protagonismu nos escaparates de les llibreríes nestes feches son la preba más evidente de la vitalidá de la creación nos dos idiomes propios d'Asturies y tamién una bona cata de la diversidá de xéneros a los que se van empobinando na so ufierta los distintos sellos. La busca d'un públicu llector cuantayá que dexó de ser dalgo más qu'un bon propósitu pa convertise nel motor cimeru qu'afala a editores y autores nel so llabor. Una seña de que la producción cultural na nuestra llingua, sinón normalizada, cada vez ta más cerca d'allegase a la normalidá.

En cierto, los llibros que van algamar visibilidá esti mayu, como preba de la salú xeneral del propiu idioma y del contestu social nel qu'alienda nun dexen d'amosar delles particulariadaes propies d'una industria a la qu'inda-y queda munchu camín per andar. Una d'elles ye'l predominiu que sigue calteniendo la poesía frente a la narrativa orixinal o traducida, pero igual de verdadero ye que añu tres añu esi desiquilibriu va pasu ente pasu amenorgando y compensándose cola calidá o l'interés de les obres nesos otros xéneros. La novela -por poner un casu del formatu eminentemente comercial en cualquier idioma afitáu- ufre nestes Lletres títulos qu'ensin dulda nun han pasar desapercibíos a los llectores atentos. Asina estrénase na narración de llargu recorríu una plumba histórica del asturianismu como la de Faustino Álvarez, traductor de clásicos contemporáneos como Dylan Thomas, con 'Flora' en Trabe. Na mesma editorial, dos nomes esenciales de la segunda xeneración del Surdimientu, como José Luis Rendueles y Xosé Nel Riesgo publiquen tamién entrambes noveles: 'La llibertá los caminos' y 'Tiempu d'escoria', respectivamente.

A la gueta de llectores mozos y de toles edaes sigue aporfiando Radagast, que tres ufrir '1809', del más nuevu de los escritores, Andrés Fernández pon enriba la mesa tres atractives propuestes universales: 'Charlie y la fábrica de chocolate' de Roald Dahl, en versión de Víctor Suárez; 'Conan el Bárbaru' de Robert E. Howard, traducíu por Adrián Carbayales, y 'La hestoria inacabable' de Michael Ende, tornáu por Xesús G. Rato. Les últimes entregues poétiques d'autores consolidaos o despuntantes van tener un bultable espaciu nes Lletres de 2022 con títulos como 'Horizonte de socesos' de Héctor Pérez Iglesias y 'Les travesíes del nómada' d'Ánxel Álvarez Llano o 'El mar que m'enchumaza' de Babel de cal Cadete, toes en Trabe, mientres Impronta aporta 'Requiem' d'Elías Veiga, 'Principiu d'incertidume' de Luis Salas Riaño ya 'Ítaca' de Berto García. La edición independiente, sofitada pol micromecenalgu, contribúi con un novedosu ya interactivu poemariu, 'Volvemos en 6 minutos', del corresponsable de la revista 'Formientu', el xixonés Diego Solís.

La ufierta pa la reciella tamién ta presente nestes dos editoriales qu'asoleyen 'El gatu con botes' de Charles Perrault illustráu por David G. Ferrero y 'Xuan y les fabes verdes' pola dibuxante María Perera, dende Impronta y Trabe con 'Unes vacaciones bien rares' d'Esther Prieto con ilustraciones de Nano González. Pintar-Pintar, pela so banda, apurrirá al estante de los llectores más pequeños, el apocayá impresu 'Prau' de Daniel García Granda con estampes d'Ester Sánchez.

Pensando nuna audiencia non netamente aguiyada pol enclín lliterariu, Delallama Editorial ábrese a toa triba de parroquianos cola publicación de 'Les farturrutes. Caleyar y comer n'Asturies', de David Castañón, una completa y gustosa guía gastronómica pa quemar caloríes dándo-y al calcañu. Y a les ufiertes de les editores privaes amestaráse esta Selmana de les Lletres la obra conmemorativa del autor remembráu, el dibuxante y músicu Igor Medio: 'El carbón y l'arena'.

• Temas
• Alitar Asturies