Llectures de branu

Anque soi de los de lleer l'añu enteru, llega'l branu y marcho debaxu'l brazu con un cargamentu llibros. Pola calor, delles son llectures pa depués de la siesta, enantes de salir. Otres son, dafecho, pa llevar na bolsa de playa o pa lleer nel cantu la piscina colos pies nel agua. Voi falar de los diez llibros que tengo preparaos. El momentu de cada ún yá lu escueyo más alantre.

Empiezo colos que son n'asturianu. El primeru ye 'Fuxir', de Pelayo Martínez Olái (Cuatro Gotes Ediciones), al que de xuru coocéis como ganador selmana tres de selmana del programa 'El Picu' de RTPA, xunto al padre. Yá-y estos díes atrás ua llectura. Son 52 narraciones mui curties. A bien d'elles tengo que volver da-yos un repasu. El segundu ye 'Si siquiera', de Vigdis Hjorth (Trabe), una traducción de Luis Salas Riaño que me recomendó Rafa Valdés. Ye de lo más tocho que pueo llevar na maleta. El terceru ye 'Miel amargo', de Xulio Vixil Castañón (Impronta), al que-y tengo ganes por ser l'anterior Premiu Xosefa Xovellanos de Novela. Téngo-y ganes, amás, porque vienme con bien de comentarios añadíos: dellos positivos y dellos que non. A ver de qué bandu soi yo al acabu de les vacaciones. Y el cuartu ye 'Los xardinos de la lluna', de Francisco Álvarez (Trabe), que lleva tiempu comigu y tovía nun-y pudiera meter mano. Prestárenme del autor bien d'otres llectures y ye probable qu'esti seya'l primeru pol qu'empiece.

Yá en castellanu, el quintu ye 'El rediezcubrimiento de México', de Marco A. Almazán (Editorial Jus), que yá lleí de críu a mediaos de los 70 y qu'agora recupero pol bon recuerdu que me dexara. El sextu ye la segunda parte de 'La saga de los longevos', d'Eva Garía Sáenz de Urturi (Planeta), que me regalara Bea Cué la primera l'añu pasáu y que, como entretenimientu total, llevo esti añu la segunda. Y de séptimu, octavu y novenu, llevo tres llibrinos de Austral Ediciones, d'esa collección piquiñina na que tien clásicos piquiñinos y que te caben nel bolsín d'atrás del pantalón, pa cualquier momentu. Son los siguientes: 'El vampiro', de John Polidori, la primer vez que surde na lliteratura esti personaxe; 'Flush', de Virginia Woolf, que ye la vida d'un cocker spaniel d'oreyes llargues y a mi valme pa lleelu col mio fox terries d'oreyes curties, que dacuando sienta a la mio vera a la hora de lleer; y 'Otra vuelta de tuerca', d'Henry James, un clásicu de les hestories de pantasmes, perfectu pa eses nueches nes que la calor nun te dexa dormir.

Y el décimu ye l'acabante salir reedición de 'La lentitud de los bueyes', de Julio Llamazarez (Nordicalibros), que val pa cualuquier momentu, que llevo tantes vueltes lleío que sé bien de poemes de memoria y qu'agora tá guapísimu con illustraciones de Leticia Ruifernández. Bon branu, pues. Siempre, a la hora la verdá, va cayer dalgún llibru más.

• Temas
• Alitar Asturies