«Escribo n'asturianu porque me presta y ya ta»
Beatriz Quintana. Algamó el Enriqueta González Rubín cola novela 'La tráxica hestoria de cómo Abraham mató a la música'
La llangreana Beatriz Quintana Coro (Riañu, 1995) daba la sorpresa nos premios lliterarios convocaos pola Conseyería de Cultura d'esti añu al algamar l'Enriqueta González Rubín de lliteratura moza cola so novela 'La tráxica hestoria de cómo Abraham mató a la música'. Integrante de la Tertulia Málory y prácticamente desconocida -quitando la so collaboración na revista 'Lliteratura' y un microrelatu col que ganó el concursu 'Entaína escribir'- esta graduada en Llingües Modernes y les sos Lliteratures , conquistó al xuráu del gallardón con una obra na que resalten «la orixinalidá del so argumentu y la narración áxil y bien estructurada qu'ufierta un viaxe temporal al traviés de la música clásica». Dende La Felguera, onde reside, fálanos de too ello con una naturalidá y un remangu tan prestosos como la llingua na que s'espresa.
-¿Qué la afaló a escribir esta novela?
-Nació d'una propuesta de Roberto Corte en Málory, que nun momentu suyu d'inspiracion díxome que tenía de facer dalgo de música clásica, una historia sobre un instrumentu (que nun voi nomar pa nun estripala). Esi dia llegué a casa y escribí nel ordenador el primer capítulu. Mandé-ylu a Rendu (José Luis Rendueles) como un cuentu namás y él contestome al otru día animándome a que siguiere: «¿Pero esto que ye? Da pa muncho más». Asina empecé a tirar de la idea hasta que salió dalgo que ya tuviere una consistencia más notable.
-¿Y el pasu de presentala al Premiu?
-Fícelo pensando que podía tener más posibilidaes al ser un concursu con un límite d'edá y que si nun lu ganaba, después al ver na nota prensa quién yera'l xuráu poder pregunta-yos qué-yos paeció, que nun fueren namás los de la Tertulia, mio madre o la mio hermana y que me pudieren dicir: «Mira falla esto». Foi asina.
-La música ta nel títulu y talo cuenta, tamién nel orixe de la novela ¿Qué papel tien na so vida?
-Dende pequeña, con siete años tuvi nel Conservatoriu del Nalón. Fice trompa, tamién viola, más alantre toqué el bombardino na Banda Municipal de Llangréu. Agora nun ye dalgo qu'estudie con muncha regularidá pero pa mi ye una fonte de placer. Siempre que puedo toi escuchando música de tolos xéneros.
-¿Cómo resumiría la novela?
-Trescurre en munches époques distintes y sin ser esa la idea que tenia yo, parezme qu'aporta un conocimientu sobre la historia de la musica clasica que puede acompañate como banda sonora.
-El xuráu inscríbela nel xéneru de terror ¿yera esi el so enfotu?
-Yo mas bien pensábalo como dalgo tráxico, con un puntu místicu, sicasí varies persones que lo lleeron enantes de presentalo y polo que veo el xuráu coincide nello, ye de que da un poco de mieu en dalgunos momentos. La mio intención yera que tuviere un componente más allegáu a la fantasía popular, a la sensación de que dalgo ta agüeyao.
-¿Por qué-y parez qu'esi enclín polo fantástico marca a tantos autores mozos n'asturianu?
-Nun sé. A mí, ye que la primera película de Harry Potter pillóme cuando taba en primaria y después nel institutu, 'Crepúsculo'. Entós, al final, ye colo que crecí y con les 'Memorias de Idhun' de Laura Gallego. Esos yeren los llibros que diba sacar a la biblioteca. Y si tengo d'elexir agora, fantasía ye lo que más me presta.
-Ye la segunda muyer en ganar esti premiu ¿Ta frañándose por fin el 'techu de cristal'?
-Yo escribo porque me apetez, lo mesmo que lo faigo n'asturiano non por ideoloxía, sinón porque me presta y ya ta. La diferencia con otres compañeres de más edá ye que yo tengo ya una vida distinta, les xeres na mio casa tan repartíes, dalgo qu'enantes nun yera tan fácil. No que faigo nun m'estremo muncho d'un home del mio tiempu.
