El Congresu Mundial de Cultura Asturiana entamáu pola Academia de la Llingua tien na sesión d'esta mañana una de les intervenciones más esperaes cola presencia del sociólogu, politólogu y caderalgu eméritu de la Universidá del País Vascu, Francisco Llera Ramo (Caravia, 1950). Nella va esponer un balance de los sos estudios sociollingüísticos sobre Asturies desenvueltos a lo llargo de más de tres décades y amosar la evolución de los resultaos algamaos nellos nes estremaes estayes plantegaes: de la percepción, conocimientu y usu de les llingües propies (asturianu y eonaviego), a les actitúes pa con elles y les sos demandes al respective en materia de normalización o de reconocencia institucional. Enantes quixo compartir con esti diariu les sos impresiones xenerales alrodiu de la situación que reflexen les encuestes dende la primera, de 1991 a la más recién, de 2023.
El cuadru xeneral tanto en cuantes al propiu usu y conocimientu, como a la valoración y les demandes normalizadores, presenta, en palabres del espertu «un perfil de dientes de sierra, con momentos de retrocesu y otros de recuperación». Nesi sen apunta que «hai altibaxos nes últimes décades que tienen de ver colos cambios demográficos producíos n'Asturies, primero negativos y qu'agora tán siendo positivos, dalgo que demográficamente ta bien pero non tanto dende'l puntu de vista de la llingua y de la cultura asturianes, porque los que lleguen son migrantes foranos y los que marchen nun son asturianos de les clases más altes, sinón de les medies y baxes, que tienen mayor venceyu cola sociedá tradicional y l'usu familiar y avezáu del asturianu o del eonaviego». Al empar produzse una evolución positiva que ye «l'avance na escolarización, un factor de recuperación fundamental y que compensa la perda de contactu col mediu rural o de la llingua patrimonial cola incorporación nel sistema escolar, onde tamos angüaño con una matrícula d'unos 23.000 escolinos». Llera Ramo recalca esti fechu: «Nesti momentu hai ya una serie de fornaes que pasaron per ehí y el gran estudiu que nos fairía falta entamar ye'l de poder comprebar qué pasa colos usos y actitúes de los que ya estudiaron asturianu o eonaviego nel sistema educativu o fuera d'él».
Nun panorama más xenéricu, el sociólogu detecta «una oscilación ente ciclos d'euforia y depresión nes espectatives sobre avances na oficialidá o nel desendolcu normativu de llesi como la d'Usu. Prodúcense asina fenómenos de retraimientu y frustración y esto quita-y puxu a la recuperación, mesmo al usu sobre too n'espacios públicos. Sigue habiéndolu bastante bonu n'espacios privaos o círculos de confianza, lo tipico nuna llingua minorizada, pero nos espacios publicos prácticamente nun esiste, quitando'l pequeñu avance que supón el so emplegu na televisión y radio autonómiques». Xunta ello, señala «un avance indiscutible no que toca l'alfabetizacion: lleer, escribir y otru datu que ya se comprobó cuando ficimos l'estudiu del 91 (col primer test d'asturianu) nel qu'alcontramos que la percepción suxetiva de conocimientu yera peor que la oxetiva, la que constatábamos. Eso volvimos atopalo na última encuesta nos tres grandes núcleos urbanos d'Asturies, inda nesta lo suxetivo y oxetivo taben bastante averaos».
En cuantes al tema de la oficialidá hai una mengua d'apoyu directu a lo llargo del tiempu, que pa Llera Ramo «nun ye tanto una cuestión ideolóxica, como de fatiga: si nun lo ves factible, pierdes enfotu» y al mesmu tiempu sorraya que «nun s'incrementa significativamente'l rechazu sinón la indiferencia, pero cuando se pregunta, como na última encuesta nel área metropolitana, onde ta casi'l 60 por cientu de la población, pol horizonte deseáu p'Asturies ye mayoritariamente billingüe (95%) o que l'asturianu tenga'l mesmu tratu institucional que les otres llingues españoles (per enriba'l 70%)». Y lo que Llera Ramo considera más resaltable ye que «nun hai una división ideolóxica nin un movimientu pendular nel que la xente votante de derecha tean a la escontra y los d'izquierda a favor, hai más intensidá en caún d'esos segmentos, pero cuando preguntamos si se defende meyor la llingua dende una posición política, la respuesta masiva ye que la meyor manera ye facelo de forma tresversal y con consensu, fuera de les pelees polítiques».
A cuentu d'esta última percepción, nes recomendaciones finales que plantega 'l sociólogu nel so balance, inda defende que «la oficialidá ye la piedra angular de la normalización» propón aplicase «al pragmatismu y al consensu, y si nun hai voluntariedá, va ser difícil. Nun hai que tener mieu a la voluntariedá , faciendo les coses bien, vistu'l sofitu de la mayor parte de la opinión pública asturiana, nun tien d'haber problema, hai futuru y tamos viéndolo nel sistema educativu, al pesar de toles torgues y desventaxes que tien. Que la llingua siga viva, con pocos recursos, sin sofitu de nada y con toles torgues del mundu, creo que ye casi un milagru, pero hai que movese lóxicamente», alvierte.
-kn4H-U190827904271ZNH-356x249@El%20Comercio.jpg)
Comentar es una ventaja exclusiva para suscriptores
¿Ya eres suscriptor?
Inicia sesiónNecesitas ser suscriptor para poder votar.