Homenaxe n'alcordanza del escritor Xosé Álvarez

La Orquesta Sinfónica del Principáu d'Asturies (OSPA) abre güey nel Auditoriu d'Uviéu la 46 Selmana de les Lletres Asturianes col so ya tradicional conciertu estraordinariu nesta data. Música de Falla, Bizet, Luna, Korsakov y Benito Lauret vale nel recital dirixíu pola batuta del maestru Óliver Díaz pa dar entamu a una cellebración qu'esti añu ta dedicada a l'alcordanza del escritor balmontín Xosé Álvarez, Pin.

L'actu institucional de la Selmana va tener sitiu el llunes que vien, día 5, na Casa Conceyu de Balmonte de Miranda, a les 12.30 hores con presencia de la Conseyera de Cultura, Vanessa Gutiérrez, y media hora más tarde va inaugurase la esposición 'Xosé Álvarez, Pin, sentimientu de la tierra' na Biblioteca Pública Municipal y descubrise una placa en remembranza del escritor y fundador del Conceyu d'Asturies en Madrid, la ciudá a la qu'emigró de mozu y onde desenvolvió un intensu llabor asturianista. A les 19.30, nel Centru Sociocultural de la capital balmontina, va cellebrase un recital nel so honor del cantante Rafa Lorenzo.

El martes 6 a les 19 hores na Biblioteca Pública Ramón Pérez d'Ayala d'Uviéu va estrenase'l documental 'Xosé Álvarez y el Conceyu d'Asturies de Madrid' y presentase la obra conmemorativa que se regala nestes Lletres cola merca de llibros n'asturianu y titulada 'Xosé Álvarez, Pin. Asturies siempre', cola participación d'Arantza Margolles, Marta López Fernández y Ernesto García del Castillo, Neto.

Los actos treslládense a Candás el miércoles 7 cola entrega nel Teatru Prendes de los premios de los certámenes escolares d'esta Selmana de les Lletres. Y el sábadu 10, nel Auditoriu de Tapia, cellébrase el 'Homenaxe as nosas lletras' cola presentación del poemariu 'El equilibrio delicado del sonámbulo' de Conchita Álvarez y la representación del espectáculu 'El viaxe de l'andolía' de la compañía teatral Nun Tris.

El pieslle del programa institucional va ser el miércoles 14 nel Centru Asturianu de Madrid cola presentación de la obra 'Per toa tierra', antoloxía lliteraria de la emigración asturiana', coordinada por Arantza Margolles.

El viernes 9 de mayu a les 19 hores l'Academia de la Llingua Asturiana entama nel Teatru Campoamor la so xunta estraordinaria na que se van acoyer a los nuevos numberarios de la institución Ruth González Rodríguez, filóloga y profesora del cursu de capacitación docente d'eonaviegu, y Alberto Fernández Costales,caderalgu de Didáutica de la Llingua y la Lliteratura na Universidá d'Uviéu. Al empar va acoyese como académica correspondiente a la escritora y profesora de la Universidá de la Ciudá de Nueva York (CUNY) a Paquita Suárez Coalla. Esi mesmu día les llibreríes ufierten el ya clásicu 10 por cientu de descuentu nes publicaciones n'asturianu, col regalu del llibru de Pin.

• Temas
• Alitar Asturies