«Llanto'l bisturí p'analizar una realidá complexa»

Adolfo Camilo Díaz (Caborana, 1963) ye un de los autores más prolíficos y premiaos de la segunda xeneración del Surdimientu. Escritor y creador tooterrenu ú los hubiere, l'azar editorial tien xuntao con un marxen escasu de meses la publicación de los sos tres últimos títulos suyos. Son les noveles 'La rabia' y 'Estraños', y la obra cola qu'algamó'l I Premiu Pachín de Melás de testos teatrales: 'Flasback'. Dende Corvera, onde Díaz empobina la xerencia de Cultura del Conceyu, fálanos de lo que quixo contar nestes obres tan distintes ente elles y xuníes toes pol mesmu enclín qu'encarrila tola trayectoria lliteraria del escritor nuna mirada crítica y ácida a la sociedá.

A cuentu de 'La rabia', nel que plantega un socesu venceyáu al terrorismu islamista, el so autor defínela como «un thriller de llibru, enllenu d'acción nun periodu de tiempu mui restrinxíu, malapenes seis hores y acotáu físicamente nun espaciu, el Muséu del Reinu d'Asturies, onde los protagonistes tienen de movese ente unos paisellos y unos sótanos pa sobrevivir». Y en cuantes a la trama apunta que «nesi curtiu espaciu d tiempu la protagonista, Tina tien vagar pa dexar de ser una muyer dependiente de la pantasma del so ex pa conertise nuna muyer autónoma, decidía, lo que se llama agora d'una manera cursi empoderada, a costa de la so entrada nel so mundu d'otru dógmaticu, fanatizáu. Anque munches veces al enzarralu nesos epítetos nun afondamos en por qué se producen esos fenómenos y ehí quería yo llantar el bisturí, p'analizar de la manera más complexa posible esa realidá y facelo al través del combate dialécticu de los personaxes. El remate final ye una mirada humanista que convida a la reflexón y al diálogu», asegura l'escritor.

Mui otru asuntu centra 'Los estraños', una novela que parte, como reconoz Adolfo Camilo Días «d'un homenaxe a una autora pa mi mui quería como ye Patricia Highsmith y cla so novela 'Estraños nun tren'. Primero vi la pelicula de Hitchcock nel 82 y desque la vi, pensé que a esi elementu tan potente de dos desconocíos que se apauten pa xenerar el crimen perfectu, podía da-y la vuelta a la situación y qu'en vez de dos desconocíos, fueren dos vieyos amigos que se planteguen dalgo éticamente tan perverso como desfacese de les sos respectives pareyes. Escribila y fíxelo en formatu teatral, d'ehí la importancia que tienen equí los diálogos. En cuantes al xéneru, esta sería una novela seminegra y con esi componente paralliterariu d'homenaxe sentíu a Highsmith», revela.

L'humor y un tresfondu sociopolíticu bien reconocible (la corrupción del sindicalista mineru Fernández Villa) marquen la so obra teatral 'Flashback', calificada pol mesmu autor como «una comedia que fala d'una traxedia». Académicamente podía ser una traxicomedia, pero en realidá trátase «d'una comedia pura y dura. L'asuntu del que fala ye tráxicu, pero tol desarrollu ye de comedia. Foi la manera qu'atopé pa contar una traxedia colectiva: naide ta 40 años liderando un sindicatu que tenia una tradición mui digna de llucha y honestidá rota por unos marafundiadores pícaros ensin qu'haya una complicidá de ltola sociedá. Por eso tenemos de ser autocríticos y humildes pa pensar si fiximos los deberes en cada momentu. Na mio opinión ye que nun tuvimos a les altures y d'esto fala tamién esta pieza».

• Temas
• Alitar Asturies