«La mina morrió y lo que conocimos ta mutando, inda nun sabemos a qué»

Dicíalo mio güela y mio güelu tamién,/.../ equí nun va quedar naide a esperar/ pa ver cómo s'esmigaya/ tol percal, yá políticu yá social,/ y colos escombros entámase/ un mercadín de señaldá/ mientres otros, más inútiles,/ más de palabra que d'obra,/ facémos-y versos y odes/a la carcoma». Asina, col desenfadu y el remangu d'un rap o d'un cantar pop, suenen los versos de 'Anatomía d'un farfagón' (Trabe), el debú poéticu d'Aníbal González Rodríguez (Moréa, Ayer, 1991) col qu'algamó el Premiu Asturies Mozo del añu pasáu. Graduáu en Filosofía, el so autor reconoz na escritura una forma afayadiza de desplicase la realidá.

-¿Cómo definiría esti llibru?

-Ye'l mio primer esperimentu poéticu que ve la lluz. Escribilu mientres la pandemia como una necesidá y los poemes tienen un xermen mui visual, fueron naciendo de semeyes que yo facía del mio pueblu: muncha colomina, les cadarmes de cases vieyes, el verde del monte... La mayoría de los poemes más políticos surdieron asina, ye la sección que titulo 'Traxicomedia de la calzada romana', onde Roma ye Europa, Occidente, lo que cada cuál quiera ver. Pero tamién hai poemes que falen de la muerte, la enfermedá, l'amor, sentía d'igualmiente la necesidá de sacalo, como qu'al facelo mancaben menos dientro.

-¿Esi tonu escuru vieno marcáu por esi momentu nel que lo escribió?

-Güei lléolo y parezme mui pesimista, ya nun lo soi tanto, pero daquella taba faciendo'l mio trabayu fin de grau de Filosofía sobre 'Bioética'... En plena pandemia. Taba manexando a Foucault, el 'Manexar y castigar', el panópticu y toa esa historia, mientres vía la fin del mundiu que yo conocía. Nun llegué pensar que nos fueren meter un chip (rises), pero yera un nivel de control bestial. Cuando escribí estos poemes taba asustáu. Fue la respuesta a esi momentu críticu. Si lo ficiere agora diba tratar los mesmos temes pero metiendo más humor, anque ye un elementu que ya tenté que tuviera presente.

-Aludía a la so formación filosófica ¿la poesía sirve-y tamién como una ferramienta de razonar o desplicar el mundu?

-Sí, ayudame a desplicame la realidá, porque nel mio casu nun tengo una mente mui científica, pero sí bastante discursiva y valiome pa entamar unes narraciones que me faen la vida más vivible. Toi mas cómodu con estes explicaciones que me doi que si lo esplorare d'otra forma. Inda nun soi un gran llector de poesía y ye cierto que les mios referencies vienen más de la Filosofía, foi la meyor forma qu'atopé d'espresar toes estes emociones que m'aforfugaben.

-Trata tamién de reinterpretar con güeyu críticu la identidá colectiva del so entornu, nesti casu de les cuenques...

-Tengo una conciencia de clase nesi sen, porque yo vengo de la mina, pero creo qu'eso morrió y hai qu'enterralo, nun podemos tar pidiendo que vuelvan les mines porque tampoco yera precisamente una vida maraviellosa, hai que mirar p'alantre. Dígolo con tol respetu, mio pá, los mios güelos, toos mineros, eso téngolo integradísimo, pero tien qu'haber vida más alantre a tolos niveles. El proletariáu tamién morrió o matáronlu, nun sé, tampoco ye'l tema que m'esmolez agora, la cuestión ye qu'hai que movese. Y lo que conocimos ta claro que ta mutando, inda nun sabemos a qué.

-La irreverencia en tratando estos temes ¿ye seña xeneracional?

-Na nuestra xeneración la respuesta, nunos casos más agresiva y notros mas tácita, ye meter humor y quitar solemnidá. Nos mios poemes mesmo los que fueron escritos n'hores baxes sentía la necesidá de meter dalguna cuña anque fuere p'alixerar, sinón ye que pégome un tiru. Entiendo que podíes ser solemne nos ochenta o noventa cuando les coses taben meyor, agora diba pareceme una catasfrofe. Ye cuestión de supervivencia el ser un poco mas irreverente, la xente mozo siempre lo foi pero nòs sentímoslo como dalgo vital. Ello nun quita que me presten les coses solemnes y pueda esfrutar con elles, sobre too na música.

-¿De qué autores mozos se siente más cercanu?

-Pablo X. Suárez flípame, esa poesía desenfadada, con esi puntu faltosucu de «escribo lo que me da pola gana y como me da pola gana», préstame, diviértome bastante y llégame. Tamién Alba Llaneza, del so poemariu 'Galerna' gústame muncho lo que cuenta y cómo lo fai. Otros llibros que me parecieron mui bonos ye 'Díes otros' de Laura Marcos o 'Superpoderes' de Miguel Rodríguez Montevaro, unos poemes que falen de nós. Y d'ente lo que lleí últimamente, destacaría 'L'allumamientu' de Pablo Texón.