La Banda de Gaites Llacín presenta'l discu 'Resollu'

El prósimu viernes 4 de xunetu, la Banda Gaites Llacín va presentar el so tercer discu 'Resollu' nun gran conciertu (22 hores), con entrada llibre, nel recintu La Portilla de la villa de Llanes y arrodiada de dalgunos de los nomes más destacaos de la música asturiana, amás de los grupos Felpeyu, Baxel y el Grupu Etnográficu L'Oriente.

El trabayu nuevu de l'agrupación que dirixen Vítor Carbajal y Nuria Tarodo ta grabáu ente los estudios de la Escuela de Música Tradicional de Llanes y Tutu de Corvera, cola producción de Sergio Rodríguez y Lisardo Prieto. Axúntense nél doce temes, escoyíos y arreglaos col sellu ya característicu de los discos anteriores de Llacín que allampia por conxugar la fidelidá a la tradición y l'apueste pola modernidá, amestando sonoridaes nueves y diverses.

En palabres del coodirector de la Banda, Vítor Carbajal: «Nesti trabayu quiximos dar otru pasu más alantre y per un llau partimos de pieces tradicionales, munches frutu del trabayu de campu y nel casu de les dos dances vocales apurríes por Xosé Ambás, pero amás quiximos fusionanos col folk acústicu de Felpeyu y agregar tamién instrumentalización de metales, teclaos, batería, dalgo que ya fixéramos en 'Xideces' (2008) y nesti casu buscamos un soníu tovía más potente de banda, añadiendo tamién programaciones. Y hai un tema que funciona como contrapuntu que ye'l 'Chan Chan' de Compay Segundo, una pieza bien guapa que quiximos adaptar a la Banda de Gaites y el resultáu ye mui chulu». Otru corte, con un significáu perespecial ye la versión que graben de 'Los Fayeos de Mayu', como homenaxe a Carlos Redondo ya Igor Medio, amestándo-y la propia voz rexistrada del recordáu bouzukista de Felpeyu y los acordes del so instrumentu, valiéndose d'un programa d'Intelixencia Artificial.

En cuantes al títulu del discu 'Resollu', Carbajal desplica que «ye una composición que fice yo pensando un poquitín en ser preparada y tocada col acompañamientu trompeta, saxo, trombonres, bateríes, que suenen tanto nel discu como en directu y pola asemeyanza cola fuerza de los aires d'estos fenómenos, los resollos o bufones, qu'amás son dalgo mui representativo de Llanes. Ye un nome que se-y da non namás al chorru del agua sinón tamién al chorru fuerte del aire, que pensamos aseméyase al soníu potente que buscamos nesti discu».

Nesti tercer álbum de Llacín, que s'ufierta ya en toles plataformes y tamién nos formatos de CD y vinilu, collaboren una montonera de músicos como Lisardo Prieto (vigulín), Luis Nicolás (guitarra), Moisés Suárez (guitarra y bouzuki), Julio Rodríguez (bouzuki), Dani Álvarez (flauta travesa y bodhran), Pepín de Muñalén (flauta travesera), Miguel Herrero (viento metales), Israel Sánchez (batería), Sam Rodríguez (piano), Sergio Rodríguez (baxu y programaciones) y Xosé Antón Ambás (voz). La mayoría van tar na presentación en directu del discu en Llanes, amás de la participación de Richard García, Kiko Flores, Luis Nicolás, Alberto Ablanedo, Lluci Palomares, Aníbal Menchaca, Ruma Barbero, Diego Pangua, Mónica Delgado o Leo Pousa.

Un conciertu pa celebrar la publicación del discu nuevu y tamién el puxu d'una Banda que lleva ya más de tres décades trabayando pola nuestra música.

• Temas
• Alitar Asturies